Arangkada of Leo Lastimosa for August 15, 2009

              UKOY SA NAGA

 

       Kinabag-an sa mga Sugbuanon nga niapil sa among survey di kapasaylo ni Gobernador Gwen Garcia.  Human siya niangkon og hingpit nga responsibilidad ug nangayo og pasaylo sa nabulilyaso nga P98 milyones nga transaksiyon pagpalit sa luna sa Tinaan, Naga nga ang labing dakong bahin naa diay ilawom sa dagat.

       Ang kasagaran sa mga nanawag sa "Arangkada" sa DYAB Abante Bisaya, nga naglakip sa pipila nga taga Dakbayan sa Sugbo, niingon nga ang pagpangayog pasaylo ni Garcia di paigo.  Angayng silotan ang mga nagpabaya sa pagpanalipod sa interes sa Sugbuanong mga magbubuhis ug ang mga nakapahimus sa di makiangayon nga transaksiyon.

-o0o-

       May mga nanawag nga maglisod pagtuo nga nagpabaya si Garcia.  Kay gihulagway man sa iyang labing suod nga kadagkoan sa Kapitolyo nga labihan kakuti-kutihan sa mga transaksiyon nga naglambigit og kuwarta.  Iya ganing manghod, si Kongresista Pablo John Garcia, niangkon nga nagreklamo ang mga kontraktor nga "malumping una ang peso sa di pa buhian" sa gobernadora.

       Nganong nikalit man lang og lugak si Garcia sa pagpalit sa luna sa mga Balili?  Nalipat ba lang sa mga opisyal sa Kapitolyo nga iyang gisaligan?  Nikagar ba lang ang iyang naandan nga kamabinantayon?  O may lain untang katuyoan ang transaksiyon apan nasimhotan lang sa nagpakabana nga mga magbubuhis?

-o0o-

       May mga nanawag sab nga niawhag nga di lang ang P37 milyones nga bayad sa 75% sa luna nga naa pa ilawom sa dagat ang bawion sa Kapitolyo.  Matod nila angayng ipauli gyod sa mga Balili ang kinatibuk-ang P98 milyones.  Kay ang 25% sa luna, nga mao ray uga, kabahin sa sa nangalisbo nga transaksiyon nga gipasikad sa pangilad ug palusot.

       Gawas pa, unsa pa may kapuslanan sa nahibilin nga unom ka ektarya nga luna nga 25 ektarya man ang gikinahanglan sa proyekto nga nahunahunaan ni Garcia nga ipatuman sa luna?  Yuna, unsa ba gyod diay ang tinuod nga plano sa Kapitolyo nga himuon sa luna?

-o0o-

       Matod ni Provincial Board Member Juan Bolo ang orihinal nga plano mao ang pagtukod og pantalan.  Apan niangkon sab siya nga wa pay pagtuon nga nahimo.  Gipalit daan ang luna kay kon unahon ang pagtuon mahibaw-an unya sa mga Balili ug mosaka na pag-ayong presyo sa luna.

       Apan ang ubang opisyal sa Kapitolyo niingon nga gamiton ang luna alang sa eco-tourism.  Ang uban niingon nga himuon ning tam-okanan sa abo gikan sa higanteng planta sa elektrisidad.  Maayo tingaling mobalik ta sa orihinal nga katuyoan nga gitakda sa resolusyon sa provincial board pagtugot ni Garcia pagpalit sa luna.  Gawas kon ang resolusyon nihatag sang Garcia og hingpit nga katungod paggamit sa luna alang sa bisan unsa nga iyang mahunahunaan—pahaom sa uga, pagatpatan ug kaukoyan.  [30]  leo_lastimosa@abs-cbn.com

Arangkada of Leo Lastimosa for August 14, 2009

              SABONG NA SAB

 

       Laing hinungdan sa pagtidlom sa kita sa mga drayber ug operators sa taxis ug PUJs, gawas sa way kinutoban nga pagsaka sa presyo sa lana, mao ang padayon nga pagdagan sa kolorum nga mga sakyanan.  Nga hangtod karon wa masulbad sa kagamhanan.  Nga di mapapas pinaagi sa pagbunal sa mga pasahero og mas dagkong plitehan.

       Inay mag-unay ang mga drayber ug operators sa usa ka bahin ug mga pasahero sa pikas nga bahin, kay pulos man sila biktima sa higanteng konsabo sa mga kompaniya sa lana ug kagamhanan pagpabiling taas sa presyo aron padayong abunda ang buhis sa lana, hain may mas maayo kon maghiusa pagpanalipod sa managsama nilang mga interes?

-o0o-

       Usa sa mga butang nga makapahiusa inay makapasabong nila mao ang pagpaningil sa LTFRB, LTO ug ubang buhatan sa kagamhanan naunsa na man ang kampanya batok sa kolorum nga taxis ug ubang sakyanang pamasahero?  Nganong bisan sa kaliboan og usa na ka kampanya nga gilusad batok sa ilegal nga mga sakyanan, wa man maibani ang gidaghanon sa mga sakyanang pamasahero nga nagsauy-saoy sa kadalanan?

       Kon tinuoray ang kampanya batok sa mga kolorum, nganong wa may nadakpan nga dagkong magpapatigayon?  Nga mao ray makapakatap sa daghang sakyanan ug makapalingiw sa mga mananakop?  Ang mga gagmay nga mangahas paglapas sa balaod dali rang pitlukon.

-o0o-

       Pila ka tuig ang nilabay, nabisto ang peke nga mga prangkisa nga nakalusot sa LTFRB.  May pipila ka opisyal nga natangtang ug nakiha.  May pipila ka sakyanan nga nangawa sa kadalanan.  Apan, ambot pila ka milyon ka pesos ang hinungdan, wa nang kairog ang kaso batok sa mga opisyal ug nakabalik na pagdagan ang kolorum nga mga sakyanan.

       Maong dihang gisapawan na sab sa LTFRB og laing mga numero ang mga taxis, sa lain na sang ulug-ulog nga pagsuway pagsikop sa mga kolorum, wa nay nibilib.  Tuod man, nagkabulingit na lang ang lehitimong taxis apan ang operators sa ilegal nga mga sakyanan padayong nagngisi.

-o0o-

       Sa di magpaka aron ingnon ang LTFRB nga kamao silang mokuwenta sa tukma nga plitehan (kon kamao pa sila, hagbay ra untang naumol ang formula pag-usab sa plitehan matag saka ug us-os sa presyo sa lana ug spare parts nga di na kinahanglang magwelgang mga drayber o mag-petisyong mga pasahero), mas maayo pang tumanon ang iyang tahas paghimong makingayon sa sektor sa transportasyon.

       Makapaabot ba tang magmilagro ang LTFRB ug mosukwahi sa pamunoan nga wa managana pagbuong sa mga institusyon aron makapatuyang sa pagpahimus ug kon masakpan mao pay masuko ug manggukod?  Gipasaligan ta sa atong katiguwangan nga ang kadaotan di molungtad hangtod sa hangtod.  Apan igo na ba ning hinungdan nga magpadayon ta sa pagpangiyugpos ug paghinan-aw lang?  [30]  leo_lastimosa@abs-cbn.com

Arangkada of Leo Lastimosa for August 12, 2009

              NATAKILPO HINUON

 

       Labihang kintu-kinto ni Pres. Arroyo dihang namatay si kanhi presidente Cory Aquino.  Kay bisan sa pagpabaha nilag ulug-ulog ni Cory dihang naglisod na pag-ayong kahimtang, si Arroyo ug iyang mga magtatambag nahibawo nga di makalimot ang nagbangotan nga katawhan giunsa nila pagbuong ang kadungganan ni Cory dihang nangahas sa pag-awhag sa resignasyon ni Arroyo tungod sa Hello Garci ug ubang mga eskandalo.

       Maong gideklarar dayon ang napu ka adlaw nga nasudnong pagbangotan, gi-holiday ang adlaw sa paglubong, gipasidunggan si Cory nga "icon of democracy" ug "national treasure," nangayo dayog pasaylo sa pagkuha sa duha niya ka guwardiya ug nagdalidali pagpauli si Arroyo aron makaabot sa kataposang adlaw sa iyang haya.

-o0o-

       Apan nasobrahan rang kintu-kinto ni Arroyo.  Natakilpo na hinuon.  Wa siya mabantog sa kamapailubon.  Mahimo nga makatago sa tinuod niyang bulok sud sa pila ka takna.  Pila ka adlaw human sa paglubong sa patayng lawas ni Cory, nahukasan ra gihapon ang tinuoray nga panagway ni Arroyo.

       Ang dul-an sa P1 milyon nga panihapon sa La Cirque sa New York mao lay nakahingpit sa paghulagway ngadto sa katawhang Pilipinhon unsa ra gyod diay kataphaw ang iyang pagduyog sa kalibotanon nga kahinugon ug pasalamat sa kanhi pangu nga gawas nga maoy nakabanhaw sa demokrasya sa nasud dako sab og natampo pagpalayas sa kawatang pamunoan ni Joseph Estrada ug pagpahimutang ni Arroyo sa gahom.

-o0o-

       Sa wa pa ang makabuhong nga habhab ug lala nilang Arroyo ug kaubanan, hinikalimtan ang kinabag-an sa ilang katawhan nga maglisod gani pagkaon og katulo matag adlaw, nabantang nang daan ang pagpaka aron ingnon ni Arroyo:

·        Nasakpan siya sa kamera nga nagngisi pagka human gyod niya og basa sa mensahe pahasubo sa kamatayon ni Cory;

·        Gipatuo niya nga alang ni Cory ang misa alang sa anibersaryo sa ilang kaminyuon sa New York; ug

·        Nagbagduy-bagdoy siya sud sa pila ka adlaw sa New York ug Los Angeles alang sa wa pa "magdalidali" pagbalik sa Pilipinas.

-o0o-

       Mapagarbuhong makapangangkon si Arroyo kanunayng makapanagang bisan unsay himuon sa iyang mga kaatbang.  Kay wa pa gani silang kahunat, duna na siyay sagang.  Makiangayon ang paniid nga mag-una siyag duha o tulo ka lakang sa oposisyon.

       Gitun-an pag-ayo ni Arroyo ang labing epektibo niyang mga lakang pagbuntog sa impeachment ug mga protesta pagpalagpot niya sa Malakanyang.  Nga maoy hinungdan nga wa dayon siya mopauli.  Gitun-an pa pag-ayo di ba siya suliyawan sa mga tawo kon mopakita sa haya ni Cory ug may kahigayonan ba nga ang lapad nga pagbangotan mosangpot sa pag-alsa batok sa iyang pamunoan.  Maong inay dasonan ang iyang kintu-kinto pagmatuod nga siyay inahan sa nagbangotang nasud, si Arroyo morang kawatan nga nibutho sa haya og kadlawong dako.  Wa gani abti og napu ka gutlo, salamat sa nasobrahang habhab ug lala.  [30]  leo_lastimosa@abs-cbn.com

Arangkada of Leo Lastimosa for August 11, 2009

              P1M HABHAB UG LALA

 

       Wa motambong si Pres. Arroyo sa reception sa kasal nilang Liloan Mayor Duke ug Christina Frasco kay nagtamod siya sa napu ka adlaw nga nasudnong pagbangotan nga iyang gideklarar human sa kamatayon ni kanhi presidente Corazon Aquino.  Apan wa siya managana, ni mangayog pasaylo hangtod karon, sa pagtambong sa P1 milyon nga panihapon sa Le Cirque sa New York.

       Nagbangotan ba gyong tinuod o nituo lang sa mga pasidaan nga ang CICC, nga maoy gihimoan sa reception, di maoy labing luwas nga dapit kon mag-uwan?  Naikog ba gyong tinuod sa kamatayon ni Cory o nangita lag mas luho nga kan-anan ug imnanan?

-o0o-

       Daghan nang yawyaw ang Malakanyang sa pagpanalipod sa P1 milyon nga panihapon nilang Pres. Arroyo, iyang banang si Mike, ug kaubanan sa Le Cirque.  Apan wa pa gyod silang katug-an pila gyoy gasto.  Gimandoan na nilang Deputy Executive Secretary sa paghatag og kuwentada sa kinatibuk-ang gasto sa biyahe.  Apan wa pay numerong giluwatan pagdason sa pagpahiyos sa eskandalo sa ilang habhab ug inom.

       Hangtod sa akong pagsuwat ini, wa pay katin-awan si Kongresista Ferdinand Martin Romualdez.  Nga maoy gitumbok nga nitakilid alang sa panihapon.  Diin siyag kuwarta nga gisakmit man sa kagamhanan ang hapit tanang kabtangan sa ilang pamilya?  Nganong nibundak mag P1 milyon alang sa di iyang anibersaryo sa kasal?  Manggihatagon ba gyod siya?  O may pabor nga gipangayo?  O may pabor nang nadawat gikan sa palasyo?

-o0o-

       Samtang nagpaabot kanus-a mokumpisal ang Malakanyang, nagkalingaw kog basa sa 37 ka pahina nga listahan sa nabantog nga mahalon nga mga bino sa Le Cirque nga giingon sa New York Post nga maoy gipatuyangan pag-order ni Arroyo ug nakapaburot sa bayranan.  Gikuyawan ko pagkakita sa pahina 3 nga nilista sa Dom Perignon "Oenotheque" 1964 nga ang half bottle tag-P120,480.00.  Hinaot nga wa siyang kaabli sa pahina 11 nga naglista sa Chateau Le Pin 1995 nga tag-P346,080.00.

       Kakuyaw kon nakaabot siya sa Romanée-Conti, Domaine de la Romanée Conti 1985 sa pahina 15 nga tag- P410,880.  Hinaot wa na siyang kakita sa Château d'Yquem, Sauternes 1900 sa pahina 30 nga tag-P566,880.00.

-o0o-

       Klarong nagduhiraw ang pasangil sa Malakanyang nga ang propaganda sa mga komunista ang pagkabisto sa P1 milyon nga panihapon nilang Arroyo.  Ang New York Post gipanag-iya ni Rupert Murdoch, kansang News Corporation maoy labing dakong gingharian sa media sa tibuok kalibotan, ug busa di kapasanginlang nagpa-ituy-itoy sa lokal nga mga komunista.

       Nagnihit ba lag libak ang Post maong gidaginot ang panihapon aron mapuno ang gikaintapan nilang Page Six?  O hilas kaayong pagwaldas sa kuwarta sa delegasyong Arroyo nga gihatagan gyod og luna labaw sa naandang mga eskandalo sa mga artista, nagpakauwawng mga magpapatigayon ug nangurakot nga mga politiko sa New York?  [30]  leo_lastimosa@abs-cbn.com

Arangkada of Leo Lastimosa for August 10, 2009

                        P1M NGA PANIHAPON

 

            Sa di pa ta malipat sa lalis tinuod bang dul-an sa P1 milyon ang gasto sa panihapon nilang Pres. Arroyo ug sa iyang delegasyon sa Le Cirque, usa sa labing mahalong kan-anan sa New York, sa bisperas sa ilang pagbalik sa Pilipinas aron makaapas sa haya ni kanhi presidente Corazon Aquino, akong gikopya gikan sa website sa kan-anan ang Chef's Tasting Menu nga mobalor og, palihug panggunit sa imong lingkoranan, P8,640 matag tawo.

Naglakip ning mosunod:  Kumamoto Oyster (champagne essence, seaweed-watercress salad); Torchon of Foie Gras (strawberries, balsamic vinegar, and crisp prosciutto); Wild Burgundy Escargot (Gruyere gnocchi, fiddlehead fern, and bottarga); Black Sea Bass (steamed with morels, rhubarb broth); Duck Breast (apricots, chocolate-peppercorn vinaigrette); ug Gianduja Chocolate Ganache (hazelnut financier and Frangelico ice cream).

-o0o-

            Kon wa pa kang katilaw, ni makahulagway, sa foie gras, wild burgundy escargot og sa ubang naapil sa menu, wa ka mag-inusara.  Ang labing adunahan rang mga Amerikanhon ug mga turista ang makasukol sa presyo sa Le Cirque.  Gawas pa, pila ra ka tawo nga naa sa ilang tarung panimuot ang makaako paggasto og P960,000 alang lang sa usa ka panihapon samtang ang kinabag-an sa ilang katagi nasud nag-ilaid sa tumang katimawa ug nagbangotan sa kamatayon sa giilang simbolo sa demokrasya?

            Kon buhis sa mga Pilipinhon maoy gibayad sa panihapon, angayng bitayon patuwad silang Arroyo, iyang bana ug kaubanan nga nihabhab ug niyarok sa makabusdik nga piging sa labing mahalong pagkaon ug bino.  Kon tinuod nga si Kongresista Ferdinand Martin Romualdez sa Leyte ang nibangka, nganong nisanong man silang Arroyo ug kaubanan sa iyang gipasiugdahang eskandalo?

-o0o-

            Ang panihapon sa matag sakop sa delegasyong Arroyo makapalit na og walo ka sakong mimis nga bugas humay ug makapakaon na sa tibuok adlaw sa gatosan ka kabos nga mga pamilya.  Ang P960,000 nga panihapon sa magtiayong Arroyo ug kaubanan makatukod na og 16,000 ka disenteng mga pinuy-anan sa Gawad Kalinga ug 6,400 ka classrooms alang sa mga tinun-an sa mga tulonghaang publiko.

            Unsa man intawon ang nisantop sa bakukang sa magtiayong Arroyo ug kaubanan?  Di ba ila man tang gipatuo nga nagbangotan sab sila sa kamatayon ni Cory?  Labihan ba gyod diay nilang guola nga nagkinahanglan man silag P1 milyon aron ang kalumsan ang ilang kagusla ug kauhaw?

-o0o-

            Palihug itandi ang gasto ni Arroyo sa panihapon sa kargador nga si Noy Ruping sa niaging gabii sa pungku-pungko sa Pier Uno:  P10 nga kan-on; P5 nga utang kamunggay, tawong, batong ug okra; P5 nga ukoy; ug P2 nga ice water.

            Si Noy Ruping, ang tinuod nga amo kay maoy nagsuhol ni Arroyo, niggasto lag P22; si Arroyo, gawas nga suluguon lang ni Noy Ruping nanumpa pang manalipod sa iyang interes, ka-upat ka gatos ka pilo ang gasto.  [30]  leo_lastimosa@abs-cbn.com

Arangkada of Leo Lastimosa for August 9, 2009

                        UHAW SA DUGO

 

            Dul-an sa 800 ang nakahatag og dugo, ang gasa sa kinabuhi, sa usa lang ka adlaw atol sa Kapamilya Blood Donation Campaign nga gipahigayon sa upat ka venues sa Metro Cebu:

·        Ang Cebu City Medical Center (CCMC) nakahipos sa labing daghan (248 ka bags sa dugo) sa EMall;

·        Ang Regional Blood Coordinating Council (RBCC) maoy ikaduhang labing daghan (221 ka bags sa dugo) sa Super Metro Mandaue uban sa Mandaue Chamber of Commerce and Industry (MCCI);

·        Ang Philippine National Red Cross (PNRC) ang nagsunod (169 ka bags sa dugo) sa Gaisano Grand Fiesta Mall Tabunok; ug

·        Ang Regional Blood Council (RBC) may 141 ka bags sa dugo sa SM City.

-o0o-

            Ang CCMC mao gyod ang kanunayng makahipos sa labing daghang dugo.  Tingali tungod sa kadaghan sa katawhan nga mahabwa gikan sa South Bus Terminal ug sa PUJs nga magbiyahean sa habagatang distrito sa Dakbayan sa Sugbo.  Nga angay lang.  Kay ang CCMC mao say nagkinahanglan sa labing daghang dugo tungod sa kadaghan sa iyang mga pasyenteng biktima sa krimen, dengue ug ubang katalagman.

            Ang CCMC, sama sa pribadong mga tambalanan, wa unta maapil sa mga gitugotan sa Department of Health (DOH) nga makahipos ug makatipig og dugo.  Apan giapil gihapon namo sila sa Kapamilya Blood Donation Campaign matag tulo ka buwan tungod sa dakong panginahanglan sa dugo sa ilang mga pasyente.

-o0o-

            Nakugang mi sa gidaghanon sa blood donors nga nagpunsisok sa Super Metro.  Nga niapil sa kampanya sa labing unang higayon.  Salamat sa tabang sa MCCI, nga nagsaulog sa Mandaue Business Month (MBM) tibuok buwan karong buwana, nakumbinser ang mga tagduma sa pagpagamit sa ilang Activity Center.

            Nasipong sa Super Metro ang blood donors gikan sa amihanang Sugbo, labi na sa mga dakbayan sa Mandaue ug Lapulapu ug kasilinganang kalungsoran.  Apan wa sab papiri ang Fiesta Mall, nga maoy gihugopan sa taga habagatang Sugbo, ug SM nga maoy gidugokan sa taga amihanang distrito sa Dakbayan sa Sugbo.

-o0o-

            Labing nakalipay namo ang wa pagtidlom sa gidaghanon sa blood donors bisan sa lagda sa DOH nga di na manghatag og blood donors cards.  Sa ato pa, ang mga mohatag og dugo di nang kapaabot nga librehon kon sila na sab, simbako, ang magkinahanglan og dugo.  Nga mao ang labing mahinungdanong prinsipyo sa paghatag sa gasa sa kinabuhi:  Mohatag kag dugo sa way pagpaabot og ganti gawas sa katagbawan nga ang matag donor makaluwas og hangtod sa tulo ka kinabuhi.

            Ang Sugbo nagkinahanglan og 100 ka bags sa dugo matag adlaw, o 3,000 ka bags matag buwan.  Maong inay kausa ra matag tulo ka buwan, himuon nang Kapamilya Blood Donation Campaign nga binuwan.  Ug palapdan na sa ubang bahin sa Sugbo ug Tungatungang Kabisay-an.  [30]  leo_lastimosa@abs-cbn.com

Arangkada of Leo Lastimosa for August 8, 2009

                        KALIT NABUT-AN

 

            Haskang buotana sa Malakanyang sa niaging mga adlaw.  Salamat sa kamatayon ni kanhi president Cory Aquino.  O sa gidaghanon sa mga tawo nga nagbangotan ug nipasidungog sa napukan nga inahan sa demokrasya sa Pilipinas.

            Subaya ra gud ang dul-an na sa siyam ka tuig nga pamunoan ni Pres. Arroyo.  Maghilak ang adlaw nga way bag-ong eskandalo nga motumaw.  O nga wa silay ikaaway ug pakauwawan.  O nga wa silay mga katungod nga mayatakan.  O nga wa silay mapasundayag nga pagwaldas-waldas sa hinagoan nga buhis sa katawhan.  O nga di sila magpaugat pagbuong sa kaligdong sa mga institusyon aron lang pagpahaom sa ilang hakog nga katuyoan.

-o0o-

            Tan-awa unsa kasulundon sa Malakanyang sa niaging usa ka semana human sa kamatayon ni Cory niadtong Sabado:

·        Nipasidungog dayon ni Cory nga "icon of democracy" ug "national treasure;"

·        Nideklarar dayon og napu ka adlaw nga nasudnong pagbangotan;

·        Nideklarar dayon nga holiday ang adlaw sa paglubong;

·        Nangayo dayon og pasaylo dihang nabisto nga gikuha ang duha ka guwardiya ni Aquino nga naglisod na sa tambalanan;

·        Nidiretso pagduaw sa haya ni Aquino si Arroyo nga mao pay pagtugpa gikan sa giputol niyang biyahe sa Estados Unidos;

·        Gihatagan og full military honors ang paglubong ni Cory bisan sa pagdumili sa iyang mga anak sa gitanyag nga state funeral; ug

·        Gipaundayonan ang mga sugyot paghimong nasudnong bayani ni Cory ug sa pagbutang sa iyang dagway sa P500 nga papel.

-o0o-

            Angayng pasidunggan ang determinadong pagpugong sa Malakanyang sa paghimo sa mosunod:

·        Pagpasulti ni kanhi justice secretary Raul Gonzalez nga nasobrahan rang pagbangotan alang ni Cory ug nga nasobrahan rang kakapayason ni Kris;

·        Pagpabungkag sa naglawudlawod nga katawhan nga nag-atang sa patayng lawas ni Cory nga nakapabara sa trapiko ug paghulga og national emergency kon hapitan nilag saway si Arroyo;

·        Pagsayaw-sayaw sa kalipay ni kanhi senador Tessie Aquino-Oreta; ug

·        Pag-insistir sa mga turutot sa Malakanyang nga purdoy ang nasudnong ekonomiya atol sa pamunoang Cory ug karon na lang nilambo ubos sa pagduma ni Arroyo.

-o0o-

            Namilok sang Malakanyang sa nag-ung-ong unta nga krisis sa konstitusyon sa pagdumili sa Judicial and Bar Council pag-usab sa lista sa unom ka nominees alang sa duha ka bakanteng lingkoranan sa Korte Suprema pinaagi sa pagtudlo sa usa sa nominees nga ila nang gisalikway.  Tukiunon pa hinuon ang legalidad sa pagtudlo nga nilapas na sa 90 ka adlaw nga lugway nga gitakda sa balaod.

      Atong atangan kon samang pagpugong ba sab gihapoy himuon sa nag-aliwaros nilang tinguha pagpamugos sa cha-cha pinaagi sa con-ass.  O kasamtangan lang ang pagbinuotan.  Sa di pa mahibalik ang naandan nga panagway sa pamunoan nga hingpit ang kamangtas.  [30]  leo_lastimosa@abs-cbn.com

Arangkada of Leo Lastimosa for August 7, 2009

              TUNGOD NI CORY

 

       Tungod sa kamatayon ni kanhi presidente Corazon Aquino, magpa-rehistro ko alang sa piniliay sa Mayo 2010.  Kataposan kong nakabotar sa piniliay sa 1987 sa akong presinto sa CSAT (karon Cebu State College of Science and Technology Main Campus) sa M.J. Cuenco Ave.

       Human niadto, tungod ba kaha sa akong kalinga sa akong trabaho isip reporter sa DYLA, o tungod ba sa akong nahibaw-an sa pagsunod sa mga panghitabo sa Sugbo ug sa nasud, wa na ko mobotar.  Bisan dihang gipasidan-an sa Comelec nga ang di kabotar sa duha ka sunudsunod nga piniliay tangtangon gikan sa listahan sa mga botante, wa na ko mosalmot sa way kapuslanan nga kalihokan.

-o0o-

       Kay akong nabantayan nga bisan kinsay nagtungkawo sa gahom, ang kahimtang sa kinabag-an sa katawhan nagpabilin nga mao lang gihapon—nagkalisudlisod, wa kaangkon sa ilang makiangayon nga bahin sa bunga sa ilang paningkamot ug gihikawan sa labing batakan nga mga pangalagad nga gibayran na untang daan sa ilang buhis.

       Wa ko mangandoy og rebolusyon.  Ni kudeta.  Wa ko mokalawat nga ang puwersa ug duguong gubat ray makabugto sa inhustisya nga gilukdo sa katawhan sukad pa sa ilang katiguwangan.  Nawad-an na lang gyod kog pagsalig sa piniliay.  Hangtod di pa gawasnon sa pagpili ang kinabag-an, wa koy nakitang kahigayonan sa tinuorayng kausaban gikan sa balota.

-o0o-

       Nausab ning tanan dihang namatay si Cory.  Dihang nakabatyag kog di masabot nga pagbangotan sa iyang pagpanaw.  Dihang nahibaw-an sa tibuok nasud ug sa tanang katawhan ang iyang kayano ug kamakiangayon sa paggamit sa gahom.  Dihang nabantang ang dagko ug makahuloganong kausaban nga iyang nahimo, nga wa mahatagi sa tinuorayng gibug-aton atol sa iyang pamunoan.

       May luna diay ang kaligdong bisan sa labing taas nga ang-ang sa kagamhanan.  May luna diay ang kabuotan bisan sa mga naghupot sa labing dagkong gahom.  May mga nangatungdanan diay niadto nga tinuoray gyong nagpakabana alang sa labing gagmay ug labing huyang nga hut-ong sa katilingban.

-o0o-

       Busa nganong moboykot pa man ko?  Nganong usikan pa mang balaanong katungod sa pagpili?  Gitambagan ko sa taga Comelec nga ID ray ipakita aron magparehistro.  Bisan sa kalangay ug kalisod pagparehistro sa Comelec sa Mandaue, determinado kong moapil sa piniliay sunod tuig.

       Pipila sa mga tigpaminaw sa Arangkada sa DYAB Abante Bisaya nipahibawo sa ilang hukom sa pagpalista sab human sa wa pagpanginlabot sa nangaging piniliay.  Nga maoy ilang paagi pagtino nga di makawang ang kabilin ni Cory.  Magtutudlo sa USJ-R, Atty. Elaine Bathan, may mas mapuslanong laraw:  Iyang ipakita sa mga tinun-an ang pelikula sa pagdaog ni Cory ug sa demokrasya batok sa diktadura sa 1986 aron pagmatuod nga wa magpasagad ang ilang katiguwangan paghimong mas gawasnon ug mas makiangayon sa kalibotan nga ilang masunod.  [30]  leo_lastimosa@abs-cbn.com

Arangkada of Leo Lastimosa for August 6, 2009

                        ANINO NI CORY

 

            Nilampos ang mga anak ni kanhi presidente Cory Aquino sa pagpatigbabaw sa kaligdong sa haya hangtod sa paglubong sa iyang patayng lawas.  Daghang salamat sa kabilin sa maayong pamatasan nga gibilin sa bantogan nilang inahan.  Nga ang ambisyusong mga politiko—sa oposisyon ug sa administrasyon—way laing kapilian gawas sa pagtahud sa ka-solemne sa kinatibuk-ang kalihokan.

            May pipila nga nisuway paghimo sa lima ka adlaw nga kalihokan nga protesta batok sa pamunoan nga giawhag ni Cory nga pakanaugon.  Apan wa magpada ang kinabag-an sa katawhan.  Nga nagpauwan ug nagpainit sud sa daghang mga takna aron lang makalili sa iyang lungon sa La Salle, sa Manila Cathedral ug sa kadalanan sa Metro Manila.

-o0o-

            Apan dunay wa mobilib sa katakos sa katawhan pagsalikway sa pamolitika aron pagbangotan sa kamatayon sa bantogang haligi sa pagkabanhaw sa demokratikanhong mga institusyon sa nasud.  Si Pres. Arroyo nanagana pagpakita sa iyang dagway sa haya ug wa gyod gani pakita sa paglubong bisan sa pasalig sa pamilyang Aquino nga hatagan siya sa tukmang pagtahud isip pangu sa republika.

            Giputol tuod niyang pagduaw sa Estados Unidos, apan si Arroyo maglisod pagpanalipod sa iyang paglangay pagpauli nga mahimo man untang mobalik og mas sayo pagtambong sa haya sa mas tukmang takna, inay nga mangadlawon pagbutho sa kataposang adlaw sa haya.  Ang iyang pagboykot sa misa requiem sa Manila Cathedral ug pagpahigayon hinuon og buwag nga misa sa Malakanyang di lang dakong insulto batok ni Cory kon dili sa Simbahang Katoliko usab.

-o0o-

            May sukaranan hinuon si Arroyo nga managana.  Kay lab-as pa alang niya ang kauwawan nga nahiagoman dihang nisuway siya pagpahasubo sa kamatayon sa lain niyang politikanhong kaatbang pila ka tuig nang nilabay:  Gikunis-kunis sa mga dumadapig ni Fernando Poe Jr. ang korona sa buwak nga iyang gipada sa haya.

            Mahimong makasalig siya ni Senador Benigno "Noynoy" Aquino III ug sa ubang mga sakop sa Pamilya Aquino.  Apan di siyang kakontrolar sa mamahimong reaksiyon sa katawhan.  Kansang pagpasidungog ni Cory mahimong iyang giisip nga pagsalikway sa iyang pamunoan.

-o0o-

            Mao ni labing dakong kalainan nilang Arroyo ug Aquino—gawas nga wa malambigit si Aquino sa bisan unsang kahiwian atol sa iyang pamunoan.  Si Aquino hugot nga mobarug ug mopatuman sa iyang gituohan nga sakto ug makiangayon bisan unsa pay sangpotanan.  Apan si Arroyo labihan ka-segurista nga kadudahan na hinuon bisan ang labing lunsay niyang katuyoan.

            Alang ni Arroyo di paigo ang iyang pagdeklarar og holiday ug napu ka adlaw nga nasudnong pagbangotan aron paghapuhap sa mga dumadapig ni Cory nga sa buhi pa gipakauwawan pag-ayo sa Malakanyang.  Nabalaka siya nga ang katawhan di kapasaylo niya bisan sa pila lang ka gutlo sa ilang pagbangotan.  Nahadlok si Arroyo sa iyang kaugalingong anino.  [30]  leo_lastimosa@abs-cbn.com

Arangkada of Leo Lastimosa for August 5, 2009

              YANONG CORY

 

       Mas nailhan na karon sa katawhang Pilipinhon si kanhi presidente Corazon Aquino human sa necrological services sa Manila Cathedral ug sa way hunong nga mga testimoniya sa iyang mga guwardiya, mga silingan, mga linudhan sa kasal ug bunyag, mga kauban sa trabaho sa sud ug sa gawas sa kagamhanan, mga kauban sa protesta ug mga katapad sa bus ug ayroplano.

Di lang siya higanteng bantayog sa ligdong nga pamolitika.  Kon dili usa sab ka yano, mahigalaon, mahigugmaon, manggihunahunaon, ug maampuon nga linalang.  Mas napalawoman ang ilang pagtugkad nganong nagpabilin ang iyang kamatinud-anon sa dihang nahuptan ang labing dako ug way kinutobang gahom ug sa dihang nahiagoman sa labing lisod nga mga pagsuway.

-o0o-

       Nakaangkon ko sa kahigayonan pagduol niya dihang kanhi presidente na.  Niduaw siya sa among sibyaanan sa pagpangampanya sa kandidatura ni Noynoy Aquino isip senador.  Lahi sa ubang inilang mga personalidad nga masum-ok sa among announcer's booth, wa siyay daghang samok bisan nagpaabot nga mahuman ang akong komentaryo sa laing kontrobersiya ug ang natanggong nga commercials.

       Wa siyay kuyog nga mga batabata nga magsige og warawara o tudlo sa ilang relo pagpasidaan nga daghan pa silang mas mahinungdanon nga mga lakaw, nga suwerte na kaayo ko nga ilang gihapit kadiyot, ug busa mahimo bang patingugon dayon nako ang ilang amo sa radyo?

-o0o-

       Lahi sa ubang gamhanang mga tawo nga magpa-interview namo, si Cory di mangutanang daan unsay among mga pangutana, o mangayong daan og lista sa among mga pangutana, o mohatag sa iyang kaugalingong listahan sa mga pangutana.

       Ug lahi sa ubang mga higante, si Cory nitubag sa tanan namong mga pangutana.  Kon duna may nanagana, ako.  Ambot tungod ba kaha sa kaikog sa kadako sa iyang katungdanan kaniadto o sa kamapasalamaton nga gihatagan kog kahigayonan sa pagpakighinabi niya, wa kong kapangutana ni Cory mahitungod sa Mendiola Massacre ug sa Hacienda Luisita.

-o0o-

       Ang labing nakapatandog nako mao ang imong pangutana sa una natong panaghinabi dihang ulitawo pa ko:  "Nganong wa pa man ko magminyo?  Kay nabalaka na kong Noynoy"  Sa ikaduhang natong hinabi, dihang minyo na ko, nangutana siya:  "Nganong nagminyo na man gyod ka?  Maayo pa ka, si Noynoy wa pa gyod."

       Giunsa man niya pagkahibawo sa kadugay nakong naminyo?  Ug kon gihunghongan lang sa iyang mga higala dinhi sa Sugbo, nganong naghago pa man siya pagpakisayod?  Wa man unta siyay makuha, nganong nakaangkon pa man og higayon sa pagtandi sa akong kahimtang ug sa bugtong niyang anak nga lalaki?  Tinuod gyod diay tingali siyang nagtugkad sa yuta.  Ug mahinangpon nga nagpakisayod sa sugilanon bisan sa labing kasarangan niya nga mga isigka tawo.  [30]  leo_lastimosa@abs-cbn.com

Arangkada of Leo Lastimosa for August 4, 2009

              KABILIN NI CORY

 

       "Di nang kapauli si Gloria!," mao ni tuaw sa pipila dihang nabantang sa tibuok nasud ang nagdasok nga kaliboan ka katawhan nga mahigugmaong nipauwan og dag nga mga buwak og tinabas nga papel, emosyonal nga nipasundayag sa senyas sa "Laban" (sukol) ug nisiyagit og "Cory!" sa pag-agi sa trak nga gikargahan sa patayng lawas ni kanhi presidente Cory Aquino.

       Apan human nilabay ang lungon, nahilis ang bagang duot sa katawhan sa Makati ug Manila.  Ang nangandoy og dihadihang pag-alsa sa katawhan maghuwat pag dugang.  Mas mahugno sila kon pahinumdoman nga bisang duguong pagbuno ni anhing senador Ninoy Aquino naabtag tulo ka tuig una nisangpot sa People Power revolution.

-o0o-

       Makapauli gihapon si Pres. Arroyo apan mahimong ang katawhan nga mosugat niya sa pagtugpa sa iyang ayroplano karong Miyerkules sa kadlawon di na mao ang katawhan nga iyang gitalikdan sa niaging semana alang sa gipasigarbo-pag-ayo-apan-nakalimtan-na-karon nga panagtagbo nilang US President Barack Obama.

       Ang katawhan nga natandog sa kamatayon ni Cory mahimo nga di na sama kamapailubon sa mga pagpatuyang sa pamunoan ni Arroyo.  Mahimo nga di na sila molingiw sa mosunod nga mga pakauwaw sa mga nagtungkawo sa gahom.  Mahimo nga di na sila magpa-ulug-ulog ni magpaabot sa sunod nga piniliay kon duna na say lain nga masakpan nga manikas ug mangawat ug motampok sa ilang bukubuko.

-o0o-

       Mas kahadlokan alang ni Arroyo mao ang pait nga kamatuoran nga wa siyay mahimo pagpugong sa pagbaha sa katawhan.  Kansang pagbangotan sa kamatayon ni Cory mahimong mosangpot sa kasilag batok sa pamunoang Arroyo.  Di niya sila kagamitan og puwersa nga epektibong nakabaraw sa nangaging mga protesta.

       Tungod sa kamatayon nga nakapadugo sa minilyon ka mga kasingkasing, nakalili sa labing unang higayon ang mga batan-on, ug napahinumdoman ang ilang mga ginikanan, nga may luna bisan sa labing taas nga ang-ang sa kagamhanan ang kaligdong ug kamatinud-anon sa pangalagad, nga maoy kabilin ni Cory apan pangitaunon kaayo sa pamunoan karon.

-o0o-

       Salamat sa kamatayon ni Cory, nakita sa katawhan ang kadako sa gahom sa pagpakabana, ang kalapad sa langyab nga maabot sa ilang pagpanginlabot, ug ang tumang kamasaaron sa ganti sa ilang pagtuo ug pagsalig sa makausa pa sa ilang kaugalingon.

       Matubag na sa di madugay ang pangutana kon unsay himuon sa katawhan kon motambong o isnabon ni Pres. Arroyo ang haya ug ang lubong ni Cory.  Ang mas mahinungdanong pangutana nga nagkinahanglan og mas dinaliang tubag:  Unsay himuon sa katawhan kon si Arroyo padayong motago inay motubag sa mga pasangil sa kahiwian batok sa iyang pamunoan; ug inay mangayo og pasaylo sa daghan niyang kasaypanan mohingpit hinuon sa pagbugalbugal pinaagi sa pagsuway pagwatas-watas sa batakang balaod ug paglugway sa iyang pagpahimus sa gahom?  [30]  leo_lastimosa@abs-cbn.com

Arangkada of Leo Lastimosa for August 3, 2009

                CORY HOLIDAY

 

            Ang pamilya ni kanhi presidente Corazon Aquino nakugang sa kamahigalaon ug kamanggihatagon sa mga lakang ni Pres. Arroyo pagpasidungog sa iya na karong gihulagway nga "national treasure" ug "icon of democracy:"

·        Pila ka gutlo human ipahibawo ni Senador Benigno "Noynoy" Aquino III ang kamatayon sa iyang inahan, nideklarar dayong Malakanyang og usa ka semanang nasudnong pagbangotan;

·        Human sa pila ka gutlo, gipatas-ang Arroyo ang nasudnong pagbangotan ngadto sa napu ka adlaw; ug

·        Dihang nipahibawong pamilyang Aquino nga way taga Malakanyang nga nakiglambigit nila, giputol ni Arroyo ang iyang biyahe sa US ug gideklarar ang Agosto 5, ang adlaw sa paglubong, nga special non working holiday.

-o0o-

            Abunda ang mga timaan nga nagkinto pag-ayong Malakanyang sa kamatayon ni kanhi presidente Aquino:

·        24 oras nga gisunod sa Malakanyang ang kahimtang sa panglawas ni Aquino dihang niangkon ang pamilya nga lisod nang iyang kahimtang;

·        Gipaandam nang daan ang militar ug kapolisan ug ubang mga buhatan sa kagamhanan sa pag-andam daan og mga pasidungog kon mamatay na si Aquino;

·        Matag adlaw nga gipahibawo sa Malakanyang ang pagpasidungog sa mga nahimo ni Aquino ug ang pagpangaliya ni Arroyo alang sa iyang kaayuhan; ug

·        Si Arroyo nisugod sa iyang Sona sa pagdapit sa tibuok nasud pag-uban niya pagpangaliya alang ni Aquino (bisan tuod gilabhan niya si Aquino uban sa laing duha ka kanhi presidente, silang Fidel Ramos ug Joseph Estrada sa pagbuylo na iyang pakigpung.)

-o0o-

            Pagmatuod lang ni unsa ka-abante ang panghunahuna ni Arroyo.  Bisan wa pa tingali kahunahuna ang iyang mga kaatbang, gipangandaman na niyang daan ang posibleng paggamit sa kamatayon ni Aquino pagpalagpot niya sa gahom.  Ang katam-is na sa ilang sinultihan gitumong aron mahapinan kon di man hingpit makalimtan ang ilang pagpanamastamas ni Aquino dihang niawhag sa iyang resignasyon tungod sa Hello Garci ug sa NBN-ZTE scandal.

            Gikuyawan si Arroyo nga moulbong kasuko sa katawhan kon mahinumdoman ang pakauwaw sa mga irong buang sa Malakanyang:

·        "I think there is no need to monitor Cory Aquino because she's also busy monitoring her own daughter."

·        "I do not know how big is the following of Cory Aquino, if she cannot get the following of Hacienda Luisita."

-o0o-

            Giputol tuod ni Arroyo ang iyang biyahe sa US.  Apan mohapit una siya sa New Jersey ug San Francisco sa di pa mopauli.  Motugpa ang iyang ayroplano sa NAIA sa Miyerkules sa kadlawon.  Abunda pang iyang panahon pagduaw sa haya ni Aquino sa La Salle Greenhills kay alas-9 pa man sa buntag ang misa requiem.

            Bisan supak sa buot, way laing mahimo silang Noynoy ug ubang sakop sa pamilyang Aquino gawas sa pag-abi-abi ni Arroyo.  Ug pagpasalamat sa iyang pagpasidungog sa kanhi presidente.  [30]  leo_lastimosa@abs-cbn.com

Arangkada of Leo Lastimosa for August 2, 2009

                        BUHI SI CORY

 

            Dihang niawhag si kanhi presidente Corazon Aquino sa resignasyon ni Pres. Arroyo pag-ulbo sa Hello Garci scandal niadtong 2005, nahiagom siya sa bangis nga kampanya sa pagpakauwaw ug pagbugalbugal nga gilusad sa Malakanyang.  Wa mokanaog sa katungdanan si Arroyo apan nagpabiling lig-on sa iyang baruganan si Cory.

            Dihang gibutyag ni Jun Lozada ang nangalisbong mga detalye sa NBN-ZTE scandal nga naglambigit ni Pres. Arroyo ug First Gentleman Mike Arroyo, nahiagom na sab si Cory, ning higayona uban nang Lozada, sa laing hugna sa way kukaluoyng kampanya sa Malakanyang pagbuong sa ilang kadungganan.  Way nahitabo sa mga imbestigasyon sa eskandalo apan wa maibani ang determinasyon ni Cory.

-o0o-

            Hangtod sa iyang kamatayon, si Cory wa maluya sa iyang kawsa pagbadlong sa dagkong kahiwian sa pamunoang Arroyo.  Bisan human sa upat ka tuig nga malampusong pagpakgang ni Arroyo sa mga kampanya pagpatubag niya sa sibaw nga mga pasangil sa pagpanikas sa piniliay ug pagpangawkaw sa panudlanan sa katawhan, si Cory namatay nga wa magbudhi ni motalaw sa di malalis niyang kaligdong.

            Tingali tungod kay di na bag-o alang ni Cory ang pag-antos, pag-agwanta ug pagpaabot.  Naabtan og tulo ka tuig human sa bangis nga pagbuno sa iyang banang si Ninoy Aquino—kanus-a nahiagom si Cory ug ang mga sakop sa iyang pamilya sa di hitupngan nga pagpanggukod ug pagpanghasi sa diktadurang Ferdinand Marcos—una niulbo ang People Power Revolution sa 1986 nga nipahimutang ni Cory sa gahom.

-o0o-

            Mas taas ang pag-antos, pag-agwanta ug pagpaabot ni Cory sa wa pa patya si Ninoy.  Kinsa gibilanggo ni Marcos human ipahamtang ang martial law niadtong 1972.  Hilom apan isog nga gisuklan ni Cory ang pagka konbikto ug silot sa kamatayon ni Ninoy, ang pagkabiktima ni Ninoy sa tikas sa piniliay sa 1980 ug ang sakit sa kasingkasing nga diriyot makakalas ni Ninoy.

            Tungod sa kahabog sa bantayog ni Ninoy, di mabasol ang katawhan nga nisalikway ni Cory nga kasarangang asawa.  Apan di kasarangan ang iyang nahimo—nagbinugtong pagpadako sa ilang mga anak sa way pagtalikod sa kawsa iyang bana.  Salamat sa iyang pag-antos, pag-agwanta ug pagpaabot, si Cory malampusong nibanhaw sa demokratikanhong mga institusyon sa nasud dihang iyang gipunit ang dakong hagit.

-o0o-

            Ang kalibotanong pagbangotan sa pagpanaw ni Cory nanukad sa higanteng haw-ang nga namugna sa kasingkasing sa matag nagpakabana nga linalang:  Lunsay ang iyang mga tumong, makiangayon ang iyang mga baruganan ug matinud-anon ang iyang mga sanglitanan.

            Napalingkawas niyang katawhan gikan sa diktadura sa iyang kinabuhi.  Wa pay nahibawo unsay mahimo sa iyang kamatayon.  Makapuypoy sa atong pagkahugno mao ang panumpa ni Cory sa iyang kataposang Sona sa 1991:  "Ang akong pagpakabana alang sa nasud ug katawhan magpadayon bisan sa akong lubnganan."   [30]  leo_lastimosa@abs-cbn.com

Arangkada of Leo Lastimosa for August 1, 2009

                        LUPIG SA BEER

 

            Sa kataposan, nagkatagbo ug nagkasulti na gyod sa linawas silang Pres. Arroyo ug Pres. Barack Obama sa White House.  Kon wa pa huwasi sa iyang kahimangod sa iyang mga kaatbang nga gipabuhagay atol sa iyang SONA, mahimo nang mamikat si Arroyo nga di diay tinuod ang mga bugalbugal nga gilikay-likayan siyang Obama.

            Apan ang bisan unsang kadungganan nga naangkon ni Arroyo isip labing unang pangu sa Asean nga gidapit ni Obama nahawongan sa laing tigom ni Obama sa White House—nga gipahigayon human sa ilang tigom ni Arroyo—ang iyang pakig-inom og beer uban sa nagkaaway nga itom nga professor sa Harvard ug puti nga polis sa Massachusetts.

-o0o-

            Klaro kaayo hain sa duha ka tigom ang giisip sa White House nga mas mahinungdanon kon ipasikad lang sa gitas-on sa panahon nga gigahin ni Obama:  30 minutos lang uban ni Arroyo nga nibiyahe gikan sa pikas nga bahin sa kalibotan aron lang makigkita niya; ug 40 minutos uban sa mga protagonist nga nakapaulbo pagbalik sa emosyonal nga lalis sa bulok sa panit.

            Bisan sa tambag ni Obama nga mahinungdanon ang pagduaw ni Arroyo, ang mga sakop sa Amerikanhong media niisip sa ikaduhang tigom nga mas dakong balita.  Way nangutana unsay ilang gipanagsultian ni Arroyo.  Gipangutana hinuon si Obama sa kahimtang sa ekonomiya ug sa iyang "beer summit."

-o0o-

            Bisan sa ubang press briefings sa White House, wa na mahisguti ang tigom nilang Arroyo ug Obama.  Inay susihon ang nag-ung-ong nga sabutsabot sa kalinaw sa Mindanao ug ang umaabot nga pagduaw ni Obama sa Indonesia ug ubang nasud sa Asean, mas interesado ang mga tigbalita unsay giinom nilang Obama ug kaubanan.

            Si Press Secretary Robert Gibbs wa sab managana paghatag sa kasayuran nga ilang gipangayo:  Bud Light ang giinom ni Obama, Sam Adams Light ang kang Harvard professor Henry Louis Gates Jr., Blue Moon ang kang police Sgt. James Crowley Gates, ug nonalcoholic nga Buckler ang kang Bise Presidente Joe Biden.

-o0o-

            Di mabasol si Arroyo nga nipaburot pag-ayo sa kamahinungdanon sa iyang pagduaw sa White House pinaagi sa pagsangyaw nga ang Pilipinas mao ang gitudlo ni Obama nga iyang "coordinator" sa Asean.  Maglisod hinuon siya pagpasabot nganong wa maapil ang Pilipinas sa mga nasud nga duawon sa Asean tour ni Obama.

            Mas maglisod pagpatin-aw si Arroyo sa mga magbubuhis nganong nagtangkil siyag 23 ka senador ug kongresista—nga ang kasagaran nagbawon sab sa ilang asawa ug bana sama niya—human napakyas paghaw-as sa kinabag-an gikan sa nagkalapad nga kagutom ug katimawa tungod sa krisis sa ekonomiya.  Labi na nga usa sa mga sakop sa iyang delegasyon, nga taguon lang nato sa ngan nga Senador Lito Lapid, nikumpisal nga ang iyang bugtong tuyo pagkuyog mao ang pagpahulagway ubang Obama.  [30]  leo_lastimosa@abs-cbn.com

Arangkada of Leo Lastimosa for July 31, 2009

              HANGAD NI OBAMA

 

       Kon ang mga dumadapig ni Pres. Arroyo ang imong paminawon, siyay labing palaran nga pangu sa nasud.  Kay siyay labing una nga pangu sa habagatan silangang Asya ang pakigtagboan ni US President Barack Obama sa White House.  Pagmatuod kini, matod nila, sa kamahinungdanon sa relasyon tali sa Pilipinas sa Estados Unidos.

       Apan ang iyang mga kaatbang nagtuo nga sabonan ni Obama si Arroyo atol sa ilang tigom karong adlawa.  Matod nila di tinuod nga "gidapit" kon dili "gipatawag" ni Obama si Arroyo.  Aron patubagon sa mga pasangil sa laktod nga mga pagpamatay, apil nang giingong pagdagit ug pagpanamastamas sa militar sa usa ka American citizen.

-o0o-

       Lisod tuohan nga human niya isnaba ang nangaging mga pagsuway ni Arroyo pagpakigtagbo niya, mokalit lang og likoy si Obama ug mahinangpon nang makigsulti sa linawas sa lider nga way bisan gamayng ikatabang sa pagkabara sa health care ug ubang mga kontrobersiya karon sa iyang pamunoan.

       Mas tulugkaron ang kasikit sa tigom nilang Obama ug Arroyo sa Washington human sa kalit nga pagbutho ni Leon Panetta, ang bag-ong hepe sa Central Intelligence Agency (CIA), sa Malakanyang.  Tsamba ba lang nga nagsunod ang duha ka dinaliang tigom?  Tsamba ba lang sab nga nahunong ang sunudsunod nga mga pagpamomba sa Mindanao human sa "courtesy call" ni Panetta?

-o0o-

       Mas sayon tuohan nga gamiton ni Obama ang ilang panagtagbo ni Arroyo aron pagmatuod sa nahauna niyang mga pamahayag batok sa malupigong mga pamunoan, nga nagpabilin sa gahom sukwahi sa kabubut-on sa katawhan.  Mahimong dasonan ang nahauna niyang pasidaan nga ang mga lider samang Arroyo nahimutang sa sayop nga bahin sa kasaysayan.

       Apan ang mga turutot ni Arroyo di kapugngan nga magpasigarbo human sa tigom, nga tak-opan gikan sa mga sakop sa media, nga ang panagtagbo usa ka makasaysayanon nga bag-ong yugto sa panaghigalaay sa duha ka nasud nga nilungtad na sa daghan uyamot nga katuigan.  Saligi hinuon ang katakos sa pamunoang Obama paggamit sa media, daan ug bag-o, pagpalusot sa tinuoray niyang mga gipanulti atol sa tigom.

-o0o-

       Apan si Arroyo di mahitabong magpatara.  Ug si Obama di hingpit nga makaduot niya.  Sa gusto niya o sa dili, si Arroyo pa ang pangu sa Pilipinas sa mosunod nga usa ka tuig.  Mahimong, sama sa nangagi nga susamang mga tigom, pulos hanap nga mga pasumbingay lang gihapon ang atong madunggan, nga mahimong sabton ug lubagon pagpahaom sa tanang hingtungdan.

       Ang labing dakong eskandalo mao ang pagtan-aw sa panagtagbo nilang Obama ug Arroyo nga maoy motino sa kaugmaon sa nasud.  Ingon ini na ba gyod ta ka-desperado nga mohangad na lang sa mga langyaw aron pagkab-ot sa kausaban nga dugay na natong gipangandoy?  [30]  leo_lastimosa@abs-cbn.com