Arangkada of Leo Lastimosa for June 27, 2010

                        Milagro sa kamunggay

 

            Dihang gihangyo namong mga tigpaminaw sa DYAB sa pagda og mga putahe nga may kamunggay, kay gihimo mang Kamunggay Festival ang labing uwahing Kumbira sa Kapamilya pagtimaan sa ika-15 nga sumad sa sibyaanan, gipakaingon namo nga pipila ray motuman ug ang kasagaran mogamit sa ilang kagawasan pagluto sa ilang tinuod nga kinaham nga mga pagkaon bahala nag way kamunggay.

            Maong labihan namong kuganga dihang nasaksihan ang lamian nga pasundayag sa mga pagkaon nga pulos naggamit og kamunggay.  Nagtuo man gud mi nga mapul-an pa og pangumbinser sa katawhan sa paggamit sa kamunggay sa bag-ong mga paagi puno sa paghimo ining sud-an.  Sama sa naandan, gipamatud-an sa katawhan nga di sama kaiwit ang iyang kasayuran kay sa gituohan.

-o0o-

            Apil sa nakadapit sa among pagtagad mao ang binangkal nga kinamunggayan, cake nga labihang berdeha tungod sa sagol nga kamunggay, kamunggay pizza, kamunggay wine, kamunggay omelet, kamunggay sandwich, pulburon nga kamunggay, kamunggay-kamote pie ug kamunggay iced tea.

            Labing kinaham sa mga nanambong ang kinamunggayan nga lechon baboy sa Danao nga gituyo pagpaandam sa nanamilit na namong kauban nga si Atty. Ina Magpale Asirit.  Nagduda hinuon ko nga tungod to kay nagpabilin ang kamadanihon sa lechon bisan duga sa kamunggay ang gipahid ug gisagolan og lab-as nga dahon sa kamunggay ang mga lamas sa tiyan.  Ang naandan nga tinunoang utan kamunggay, tinunoang nangka ug kamunggay, manok nga kinamunggayan ug sardinas nga kinamunggayan wa sab pasayloa sa mga nangumbira.

-o0o-

            Kamunggay ang logo sa Food and Nutrition Reasearch Institute sa Department of Science and Technology.  Gawas nga pagkaon, ang kamunggay makatabang pagtin-aw sa panan-aw, paghilis sa pagkaon, pag-ayo sa sakit sa tiyan, paglimpiyo sa samad, pag-ayo sa hubak, sakit sa dunggan ug labad sa ulo.  Tungod sa kaabunda sa calcium, ang kamunggay makapalambo sab pag-ayo sa gatas sa mga inahan nga nagpatutoy.

            Si Josie Elli, senior science research specialist sa DOST 7, nipasabot sa mga nanambong sa Kumbira nga daghan nang mga produkto ug teknolohiya sa kamunggay.  Mapauga ang kamunggay nga di mawa ang kamapuslanon aron mapulbos ug maggamit sa mas daghang mas mapuslanong mga paagi.

-o0o-

            Alang sa mga nagduda pa sa kamunggay, palihug basaha ni:  Ang usa ka tasa nga linuto nga kamunggay dunay 3.1 g. protein, 0.6 g. fiber, 96 mg calcium, 29 mg phosphorus, 1.7 mg iron, 2,820 mg carotene, 0.07 mg thiamin,0.14 mg riboflavin, 1.1 mg niacin, and 53mg ascorbic acid or vitamin C. Ang antioxidant activity sa kamunggay 71%, ubang α- tocopherol (vitamin E) equivalent nga 45.

Tungod sa abundang vitamins A, C ug E nga gamhanang antioxidants, ang kamunggay makapugong sa arthritis, cancer, mga sakit sa kidney ug kasingkasing ug pagpangunot sa panit.  Ang kamunggay duna say phytochemical niaziminin nga makabatok sa tumor.  [30]  leo_lastimosa@abs-cbn.com

Arangkada of Leo Lastimosa for June 25, 2010

                        Gaway ni Gloria

 

            Naghinam-hinam nang militanteng mga pundok ug ubang nagpakabanang sektor sa ka katilingban pagpasaka og mga kasong pagpangawkaw batok ni Pres. Arroyo.  Kinsa mahukasan na sa presidential immunity from suit human sa udtong tutok sa Hunyo 30.  Sa kataposan, mapaninglan na gyod nila si Arroyo sa tanang mga pasangil sa pagpangawkaw sa siyam ka tuig niyang pagtungkawo sa Malakanyang.

            Magkapuliki gyod tinuod si Arroyo pagpanagang sa magpungasi nga mga kaso batok niya.  Di nang kapasalipod sa iyang mga alyado sa Kongreso nga nibasura sa tanang impeachment complaints ug nibabag sa tanang pagsuway pag-imbestigar sa mga pasangil batok niya.  Di na sab mahimong moingon lang nga, "I'm sorry," sa way pag-angkon og bisan unsang kasal-anan.

                        -o0o-

            Apan ang tanang mga kasong kriminal nga ipasaka batok ni Pres. Arroyo moagi sa buhatan sa Ombudsman.  Nga giduma ni Merceditas Gutierrez.  Classmate ni First Gentleman Mike Arroyo, tinudlo ni Pres. Arroyo ug magpabilin sa katungdanan hangtod sa Disyembre 2012.

            Kinsa nimatuod sa makadaghan na uyamot nga higayon nga mas matinahuron sa mga Arroyo kay sa balaod.  Kansang labing uwahing salida mao ang pagyaka sa $329 milyones nga eskandalo sa NBN-ZTE, pagpalingkawas sa first gentleman dihang sibaw nang awhag sa pagpasaka sa kaso sa Sandiganbayan, pagsakripisyo ni kanhi Comelec chairman Benjamin Abalos ug pagduhig pa gyod ni SSS President Romulo Neri nga mao untay nibutyag sa pagsuway pagpanuburno.

                        -o0o-

            Wa paminawa ni Gutierrez ang mga awhag nga mokanaog sa katungdanan dungan sa pagbiya ni Arroyo sa Malakanyang.  Aron kahatagan og hingpit nga kagawasan si President-elect Noynoy Aquino pagtakda og lab-as nga direksiyon sa kampanya batok sa pagpangawkaw.

            Samang Arroyo, si Gutierrez duna say immunity from suit.  Mapalagpot lang sa katungdanan pinaagi sa impeachment.  Nga makapabuak-buak lang sa Kongreso ug makalipat sa Malakanyang kon ilusad sa unang tuig sa pamunoang Aquino.  Sa ato pa, kon magpabaga gyod si Gutierrez pagyaka sa mga kaso batok ni Arroyo, gikahadlokan nga bisan ang dagkong gahom sa buhatan ni Aquino way mahimo.

                        -o0o-

            Inutil ba gyod si Aquino ug ang minilyon ka katawhang Pilipinhon nga nipili niya sa niaging piniliay sa mga gaway samang Gutierrez nga gipahimutang daan ni Arroyo pangandam sa iyang pagbiya sa Malakanyang?  Mao nay hagit sa liderato ni Aquino ug sa padayong pagpakabana sa katawhan.

            Seguro nang makuha ni Aquino ang mayoriya sa House of Representatives.  Mahimong makuha sab ang liderato sa Senado.  Apan ang mga kongresista ug mga senador igo lang magpaling-paling asa padung ang hangin sa politika.  Ang Ombudsman, ang prosecutors ug ang mga maghuhukom sa Korte Suprema ug ubos nga mga hukmanan kinahanglan nga mopadaplin sa ilang utang kabubut-on ug mopatigbabaw sa mas dako nilang katungdanan sa nasud, sa katawhan ug sa kasaysayan.  [30]  leo_lastimosa@abs-cbn.com

Arangkada of Leo Lastimosa for June 24, 2010

                            Alas ni Binay

 

              Maayong pagkaduwa ni Vice President-elect Jejomar Binay ang iyang baraha.  Samtang pila na lang ka adlaw sa di pa siya moasumir sa Malakanyang uban ni President-elect Noynoy Aquino.  Sama sa kangilngig nga nakatago sa tanan niyang alas sa niaging kampanya:  Sa pagdiga sa inanay niyang pag-apas ni Senador Loren Legarda pila ka semana wa pang piniliay; ug sa kalit ug makapakugang nga pagbundak sa iyang labaw ni Senador Mar Roxas sa adlaw sa piniliay.

              Way makatulisok ni Binay nga nagpa-presyo.  Ni nanglawgaw sa pag-organisar ni Aquino sa iyang gabinete ug sa pagpangandam sa makasaysayanon nga inugurasyon karong Hunyo 30.  Way makapasangil ni Binay nga nisabotahe sa anak sa iyang pinangga nga si kanhi presidente Cory.

-o0o-

              Di hinuon lunsay si Binay.  Napakyas siya pagtago sa tanang sidsid sa sayal sa iyang ka-burukinto.  Sama sa iya untang pagpanumpa atubangan ni Chief Justice Renato Corona, nga makapa-bakikaw sa padayong pagkuwestiyon ni Aquino sa pagdalidali ni Pres. Arroyo pagtudlo ni Corona sa higayon nga gidid-an siya sa balaod.  Ug sa iya untang pagpapanumpa sa mga Marcos--silang Imelda, Bongbong ug Imee--nga mosukwahi sa panumpa ni Aquino pagtinuod pagsakmit sa tanan nilang ilegal nga katigayonan.

              Apan gibalikan si Binay sa tarung nga kabuot.  Adto siya manumpa sa panumpaan ni Aquino nga si Associate Justice Conchita Carpio Morales.  Ug iyang gibalibaran ang mga Marcos.

-o0o-

              Laing timaan nga di hingpit nga magpa-upuy-upoy si Binay mao ang iyang pagpangayo sa Department of Interior and Local Governments (DILG).  Nga duna siyay katungod sa iyang gipasigarbo sa dagko niyang nahimo isip mayor sa Makati City.

              Apan may sukaranan ang mga pagduda nga gamiton lang niya ang DILG pagpalambo sa iyang politikanhon nga mga ambisyon sa sunod nga piniliayng presidensiyal sa 2016.  Gawas pa, di siyang kalalis sa katakos, kahaom ug kaligdong sa napilian ni Aquino alang sa DILG nga si Magsaysay Awardee ug Naga City Mayor Jesse Robredo.

              Mao nga alas nga baraha ang gipagawas ni Binay dihang nakigkita siyang Aquino ug nitataw nga di na siya mangayo og bisan unsang buhatan.

-o0o-

              Si Binay di kaaway ni Aquino.  Maisip gani nga mas suod pa siya ngadtong Aquino ug sa iyang igsuong mga babaye kay ni Roxas.  Kinsa nipasangil nga gibukubuko siya sa mga paryente ni Aquino.  Maong di mabasol si Aquino nga magdumili paghatag sa bisan unsay pangayuon ni Binay tungod sa giisip nga dakong utang kabubut-on sa pagpadaplin sa ambisyon ni Roxas nga mag-presidente alang niya.

              May alas pa hinuon si Binay.  Nahibawo sab si Aquino nga di maayong tan-awon nga iya na lang sab nga nuntan ang pagpanluod ni Roxas.  Ug lisod pasabton ang katawhan nganong himuon lang niyang reserba nga ligid ang ilang gipili nga bise presidente.  [30]  leo_lastimosa@abs-cbn.com

Arangkada of Leo Lastimosa for June 23, 2010

                        Baga pang Bangit

 

            Maayo pa si AFP Chief Delfin Bangit.  Human laktawi sa Commission on Appointments (CA) ug human naklaro nga di gyod siya itudlo pag-usab sa samang katungdanan ni President-elect Noynoy Aquino, ang sunod niya nga commander-in-chief, nipili si Bangit sa pag-retiro og sayo.

            Lahi sa ubang tinudlo ni Pres. Arroyo.  Bisan sama sa kang Bangit gikuwestiyon sab ang legalidad sa ilang pagkatudlo, nipili sila sa pagpaugat.  Bahala na kon ang batakan nga lagda sa kaligdong nag-aghat unta nila paghatag og kagawasan sa sunod nga pamunoan pagpili og ikapuli nila pinaagi sa pagtunol sa ilang courtesy resignations, nipilit sila nga morang mga alimatok sa ilang mga buhatan.

                        -o0o-

            Wa hinuoy laing kapilian si Bangit.  Kon magpabilin sa Armadong Kusog, mauwawan lang siya.  O kon way uwaw mahimong bakikaw di lang ang iyang kahimtang kon dili hasta nang militar.  Kay gawas nga hukasan pagka AFP chief, mahimo pa gyong sakop sa Task Force Lily, ang makauuwaw nga takoban sa mga sundawo nga naglutaw-lutaw kay way klarong trabaho.  Manlipaghong sang AFP nga duna silay three-star general nga magpatid-patid lang sa lata hangtod nga moretiro sa Hulyo sunod tuig.

            Maong bisan matulisok si Bangit sa pagpahimus sa iyang kasikit ni Arroyo paglaktaw sa mas tag-as nga mga opisyal aron pag-angkon sa labing taas nga katungdanan sa AFP, angay gihapon siyang himuong maayong sanglitanan.

                        -o0o-

            Nga di masulti mahitungod sa retiradong heneral nga si Danilo Augusto Francia, General Manager sa Mactan-Cebu International Airport Authority (MCIAA).  Kinsa nagdumili pagsumiter og courtesy resignation bisan mapupos ang iyang termino dungan ni Arroyo sa udtong tutok sa Hunyo 30.  Nagdahom pa gihapon si Francia hangtod karon nga ipabilin siya ni Aquino sa katungdanan.

            Ang mas makapasubo mao nga niliwat ni Francia ang iyang kaubanan sa MCIAA Board nga silang Leandro Mendoza, Ace Durano, Alberto Agra, Margarito Teves, Alfonso Cusi, Gobernador Gwen Garcia, Winglip Chang, Gordon Joseph, Valeriano Avila ug Renato Osmeña.

                        -o0o-

            Samang Bangit, kuwestiyonable sab ang pagkatudlo ni Francia.  Kay sama sa ubang mga tagduma sa MCIAA, wa siyay career executive service office (CESO) eligibility.  Katapolan ug katalawan sa Civil Service Commission (CSC) ug pagpapating sa Malakanyang ug sa MCIAA maoy nakapapilit niya sa katungdanan sud na ron sa upat ka tuig.

            May sukaranan ang pagsalig sa mga dumadapig ni Francia nga padayon siyang dapigan sa CSC.  Kansang tsirman, Francisco Duque III, tinudlo ni Arroyo ug magpabilin sa katungdanan sa mosunod nga pito ka tuig.  Apan sa di pa siyang kaduphan ni Duque, kinahanglang itudlo una si Francia pagbalik sa MCIAA.  Ug ang bugtong makatudlo niya pagbalik mao si Aquino.  Nga suko nang daan ni Bangit, unsa na kaha sa mga tinudlo ni Arroyo nga mas baga pang Bangit?  [30]  leo_lastimosa@abs-cbn.com

Arangkada of Leo Lastimosa for June 22, 2010

                        Gilawog sa pangpang

 

            Tan-awa ra gud ning binuang sa LTO ug LTFRB.  Dihang natay-og ang tibuok nasud sa kadaghan sa mga langyaw nga nangamatay sa paglayat sa bus sa lawom nga pangpang sa Balamban, kasadpang Sugbo niadtong Hunyo 13, nisalida dayon ang ilang kadagkoan.  Gisuspenso ang prangkisa sa JD Tours, ang tag-iya sa bus, gilangkatan og plaka ang tanang sakyanan sa JD Rent-a-Car ug gisusi ang tanang mga drayber.

            Mga kabanay ug kahigalaan sa mga biktima, kasagaran mga langyaw, nihangop sa paspas nga lakang sa duha ka buhatan sa kagamhanan.  Apan ang mga nasuhito sa kataphaw sa LTO ug LTFRB pagpatuman sa ilang mga lagda igo lang nipakibo sa ilang abaga.

-o0o-

            May sukaranan ang pagduda sa kamatinud-anon sa kagamhanan paghatag og hustisya sa 20 ka Iranian nationals nga nangamatay ug sa mas daghang Iranians, Pakistanis ug mga Pinoy nga survivors sa trahedya sa Balamban.  Kay wa pa gani mohupas ang pagbangotan ug pagpakabana sa mga embahada sa Iran ug Pakistan, nipakita nang LTO ug LTFRB sa ilang naandan nga paglikoy.

            Nahagbong ang kasagaran sa mga sakyanan sa JD sa unang hugna sa mga pagsuway sa ilang kahaom pagdagan sa kadalanan.  Nahagbong sab ang kinabag-an sa mga drayber sa pagsukod sa ilang katakos pagmaneho og mga sakyanan.  Apan way tinguha ang LTO ug LTFRB pagsilot nila sa pagpahimutang sa kakuyaw sa kinabuhi ug kabtangan sa ilang mga pasahero.

-o0o-

            Gisubli-subli ang pagsuway sa mga sakyanan hangtod nga nakapasar ang mayoriya nila sa Motor Vehicle Inspection Center (MVIC) sa LTO sa Mandaue.  Pakuhaon sab og laing pasulit ang mga drayber.  Unya na sila ideklarar nga di kamao kon mangahagbong lang gihapon sa ikatulong higayon.

            Ambot nganong way nakahunghong sa kadagkoan sa LTO ug LTFRB nga ang mga sakyanan nga molayat sa pangpang inay mosubay sa dan kay di roadworthy di mohatag og ikaduhang kahigayonan sa mga pasahero.  Ambot nganong way nakadukol nila sa pait nga kamatuoran nga ang mga drayber nga wa mahibawo nga mas kasaligan ang engine break kay sa pagsige og tamak sa preno kon maglugsong og lawom nga lugot ang ilang sakyanan di makapangayo og "Take 3" alang sa daghang mga pasahero nga maangin sa ilang kabanga.

-o0o-

            Di ni angkunon sa LTO ug LTFRB.  Apan ang tinuod mao nga wa silay laing kapilian gawas sa pagpa-goryo-goryo.  Kay ang pagtinuod paggukod sa JD ug ubang masalaypon nga mga kompaniya sa mga sakyanan mosumbalik ra gihapon sa duha ka buhatan.

            Kay ang pagdagan sa di roadworthy nga mga sakyanan sa JD ug ubang mga kompaniya, ug ang pagtugyan sa kuwestiyonable nang daan nga mga sakyanan ngadto sa mas kuwestiyonable pa gyod nga mga drayber, maoy di malalis nga ebidensiya sa kapakyas sa LTO ug LTFRB pagpatuman sa ilang mga lagda.  [30]  leo_lastimosa@abs-cbn.com

Arangkada of Leo Lastimosa for June 21, 2010

                        Hagit ni Noynoy

 

            Karong pila na lang ka adlaw ang nahibilin sa gumagawas nga pamunoan ni Pres. Arroyo, di mabasol ang katawhan nga maghupot og paglaom nga matapos na gyod ang di maayong pangalagad, kon duna man, sa nagkalainlaing mga buhatan sa kagamhanan.  May sukaranan ang ilang pag-isip sa umaabot nga Hunyo 30, nga gideklarar nang Arroyo nga special nonworking holiday, nga tinuorayng adlaw sa paglingkawas.

            Nga maoy usa sa labing bug-at nga tahas ni President-elect Noynoy Aquino, nga mobanos na pagduma sa Malakanyang sa udtong tutok sa Hunyo 30.  Ang mga buhatan sa kagamhanan, apil nang pipila nga nakapahimangod pag-ayo sa kinabag-an, maoy mamahimong sukdanan sa mga magbubuhis pagsusi sa kamatinud-anon sa iyang gisaad nga kausaban.

-o0o-

            Karong semanaha, nganlan nang Aquino ang mga sakop sa iyang gabinete.  Samtang di pa kahulipan ang gibanabanang 4,500 ka bakanteng mga katungdanan sa nasudnong burukrasya, ang iyang ipanudlo nga mga kalihim sa nagkalainlaing mga departamento ag-agon pag-ayo kon unsay katakos ug kaligdong sa huptan nila nga mahinungdanon nga mga gimbuhaton.

            Takos ba ang iyang mga ipanudlo?  Unsa may kasinatian nga nakaandam nila sa gisangon nga katungdanan?  Gawas sa ilang kasuod ug pagsalig ni Aquino nila, unsa may lain nilang ikapasigarbo?  Ug labaw sa tanan, human nilampos si Aquino pagkumbinser sa mga botante nga siyay labing kasaligan sa pagbadlong sa pangurakot, may kaligdong ba sila pagdasig pagbalik sa kadasig sa katawhan?

-o0o-

            Usa sa giatangan pag-ayo mao ang pagtudlo ni Aquino og bag-ong pangu sa GSIS.  Kay ang termino sa Sugbuanong presidente ug general manager, Winston Garcia, mapupos man sab dungan sa kang Arroyo karong Hunyo 30.  Mahatag na ba gyod sa tukmang panahon, human sa way kinutoban nga kalangay, ang pensions ug ubang mga benepisyo sa mga sakop sa GSIS?

            Mahibaw-an na ba gyod ang tinuorayng kahimtang sa panalapi sa GSIS?  Unsa may tinuod:  Ang pangangkon ni Garcia nga nilambo pag-ayo ang panalapi ubos sa iyang liderato; o ang pagduda nga nabangkarota nang GSIS maong kanunayng nabara ang mga benepisyo nga gipasangil lang sa computerization?

-o0o-

            Mahunong na bang kinawatay sa Customs, BIR, DPWH, DOTC ug ubang nangalisbo na pag-ayo nga mga buhatan?  Human napakyas ang kabuotan ni kanhi presidente Corazon Aquino pagbadlong sa mga kiriwan, mahimong di paigo ang pasalig ni Aquino nga kon ligdong ang pangu di na mangawat ang mga sakop.

            Mahimong mapasabot ni Aquino ang katawhan nga ang maayong sangpotanan sa labing makahuloganon nga kausaban sa kagamhanan di mabatyagan sa usa lang ka pamilok.  O sa pila lang ka tuig.  Apan sa kapulihay, hukman ang iyang pamunoan sa katakos, o kapakyas, pagbutang og pagkaon sa matag lamesa, tambal ug mga mananambal sa mga tambalanan, kalidad nga edukasyon ug pagpatuman sa balaod bisan kinsay hingtungdan ug bisan siya pay maig-an.  [30]  leo_lastimosa@abs-cbn.com

Arangkada of Leo Lastimosa for June 20, 2010

                        Way kinutobang Halad

 

            Civic leader nga matinud-anong nagpakabana paghatag pagbalik sa panan-aw sa katawhan nga napagngan sa kahayag, mayor-elect nga masaligon nga iyang mabugkos ang kagamhanan ug pribadong sektor pagtubag sa labing batakang panginahanglan sa mga Sugbuanon, konsehal nga nawili pagbiya sa nawili pagbiya sa komitiba alang sa pamuo ug panginabuhi apan mopunit sa bag-ong hagit pagsulbad sa nagbuntaog nga suliran sa basura ug batan-ong magpapatigayon nga gusto lang makigsawo sa mga grasya nga iyang nadawat.

            Silang tanan akong gikahimamat atol sa Grand Halad sa Kapamilya, ang labing dakong piyesta sa libreng mga pangalagad, sa Abellana National School sa Dakbayan sa Sugbo.  Silang tanan nipalig-on sa pagtuo nga way kang-a, bisan unsa kadako, nga di mahimoan og taytayan tali sa mga may katakos pagtabang ug sa labing nagkinahanglan og tabang.

-o0o-

            Si Elizabeth Yang, tagduma sa Lions Medical Eye Bank, nimatuod na sab sa talagsaong katakos sa iyang pagtabang pinaagi sa pag-apud-apod og 500 ka libreng reading eyeglasses ngadto sa labing kabos nga mga pasyente.  Giabagan siya sa mga doktor sa Southwestern University.  Sa tapad nga lawak, ang Fernandez Eye Clinic nanghatag sab og 200 ka reading eyeglasses.

            Si Yang may mas dako ug mas lisod nga kawsa:  Ang pagpahiuli sa panan-aw sa labing daghan nga mga buta nga iyang matabangan.  Nga iyang gipakigbisogan pinaagi sa pagkumbinser natong tanan sa kasayon ug kamapuslanon sa paghatag sa cornea sa atong mga mata sa ato nang pagkamatay.

-o0o-

            Si Cebu City Mayor-elect Michael Rama nihapit sa Halad aron pagpasabot sa lukop-dakbayan nga pagpanlimpiyo sa kabaybayonan, mga kanal ug tibuok palibot.  Kabahin ni programang "spider web" nga iyang gitinguha nga mobugkos sa tanang paningkamot sa tanang buhatan sa kagamhanan ug nagpakabana nga mga sektor sa katilingban pagtubag sa labing batakan natong panginahanglan sa kahimsog, kahusay ug kalinaw, panginabuhi, arte, kultura ug turismo.

            Nakatapad sab nako atol sa paglusad sa 52^nd Cebu City Local Job Fair sa Abellana gihapon si Cebu City Councilor Edu Rama.  Nga nituki sa pasiuna niyang mga lakang pagtuman sa bag-o niyang tahas paghipos sa basura sa dakbayan.  Nanghinaot hinuon si Fidel Magno sa DMDP nga di hingpit nga talikdan ni Rama ang iyang gipasiugdahan nga mga programa sa panginabuhi.

-o0o-

            Ug akong nahimamat si Lorda Laborte, anak ni anhing Nang Johnny Laborte, ang nabantog nga tigpaminaw sa radyo nga aktibo kaayong tigpaluyo sa labing dagkong mga kawsa.  Nitampo si Lorda og pagkaon alang sa gatosan ka mga boluntaryo sa Halad.  Nahibawo na ko diin liwat sa iyang kamanggihatagon.

            Di paigo ang akong luna dinhi pagpasalamat sa tanang nakatabang sa Grand Halad sa Kapamilya.  Daghan, daghang salamat kaninyong tanan.  Dayon namong tapos gahapon, giduol ko nilang Devin Go ug Carmen Piramide sa USC nga nagsusi madayon bang sunod namong Halad sa mas lapad nga USC Talamban Campus.  [30]  leo_lastimosa@abs-cbn

Arangkada of Leo Lastimosa for June 19, 2010

                        Pagsawop sa Celtics

 

            Human napakyas pagsakmit sa kampeyonato sa NBA gikan sa higpit nilang karibal Los Angeles Lakers, ang Boston Celtics gituohan nga mabungkag na.  Si Head Coach Doc Rivers mahimong di na motiwas sa nahibiling usa ka tuig sa iyang kontrata.  Kon di kapugngan sa management sa iyang gisubli-subli nang tinguha paggahin og dugang panahon uban sa iyang pamilya.

            Napupos na sang kontrata ni Ray Allen.  Nga 35 anyos na ug hagbay rang gipanghagad sa Celtics sa ubang teams alang sa masaarong batan-on bisan di pa sama kahingigo nga magduduwa.  Ang kontrata ni Kevin Garnett, 34, nga di na sama kapaspas ug ka-agresibo human sa operasyon sa iyang tuhod sa niaging tuig, mapupos sa 2012.  Si Paul Pierce, 33, gawasnon nang di motiwas sa iyang kontrata nga mapupos sunod tuig.

                        -o0o-

            Mas masaaron ang laing dinastiya sa Lakers.  Silang Kobe Bryant (nga mag-32 karong Agosto) ug Pau Gasol (30 anyos karong Hulyo) may kontrata uban sa Lakers hangtod sa 2014.  Silang Andrew Bynum, 22, ug Lamar Odom, 30, may kontrata hangtod sa 2013.  Si Ron Artest, 30, maoy labing mubo og kontrata, hangtod sa 2012.

            Apan ang dinastiya sa Lakers mag-agad kon magpabilin pang ka-dominante ni Bryant—nga nagsugod nag batyag sa kakutas ug nagkalainlaing mga sakit human sa 14 na ka season sa NBA.  Ug kon mobalik pa si Head Coach Phil Jackson, 65, sa laing season.  Bisan laslasan ang $12 milyones niyang suholan ug bisan padayong mag-agwanta sa mas daghan pa niyang mga sakit.

                        -o0o-

            Nagsugod na og pangandam ang Celtics sa adlaw nga di nang masakwat nilang Pierce, Garnett ug Allen ang prangkisa.  Si Rajon Rondo, 24, nipasundayag sa pipila sa mga duwa sa playoffs ug sa finals sa iyang katakos isip bag-ong pangu ug posibleng labing maayong magduduwa sa Celtics.  Ug si Kendrick Perkins, bisan nabaldado sa Game 7, 25 pa ug dakog papel sa ugma sa team.

            Nga di masulti sa Lakers mahitungod ni Derek Fisher.  Bisan sa ilang kamapasalamaton sa magduduwa nga nahimong kabahin sa tanan nilang kampeyonato sukad sa tuig 2000, ang Lakers mahimong di na mopabalik ni Fisher, nga 36 na karong Agosto ug labihan nang hinaya.

                        -o0o-

            Way makalalis sa kamakahuloganon sa kadaogan sa Lakers.  Mao toy labing una nilang daog sa lima nila ka panag-abot sa Celtics sa Game 7 sa NBA Finals.  Sagunson silang napilde sa unang upat nila ka bangga niadtong 1962, 1966, 1969 ug 1984.  Labing tam-is ang kadaogan ni Bryant kay nakabutang og kinutoban sa kahimangod nilang Jerry West ug ubang higanteng Lakers.

            Ang kadaogan nakapilot sa kang-a sa gidaghanon sa ilang mga kampeyonato:  16 sa Lakers batok sa 17 sa Celtics.  Nga mahimong matabla na sunod tuig kon mobalik si Jackson ug himsog si Bryant.  [30]  leo_lastimosa@abs-cbn.com

Arangkada of Leo Lastimosa for June 18, 2010

                        Giya sa Halad sa Kapamilya

 

            Kon gusto kang makapahimus sa labing daghan nga libre nga pangalagad atol sa Grand Halad sa Kapamilya tibuok adlaw karong Sabado sa Abellana National School sa Osmena Blvd., Dakbayan sa Sugbo, kinahanglan nga mosayo aron makapahimus dayon sa mosunod nga mga pangalagad nga punsisokan sa daghang mga tawo:

·        Sama sa libreng konsulta sa doktor ug libreng tambal sa Kapamilya Medical Mission;

·        Libreng paghiling sa mata ug reading eyeglasses sa Fernandez Eye Clinic ug Lions Medical Eye Bank;

·        Libreng ibot sa ngipon sa Kapamilya Dental Mission;

·        Libreng chest x-ray sa Reactive Medical Laboratory and X-Ray ug Chong Hua Hospital; ug

·        Libreng kapon, bakuna, purga, bitamina ug shampoo alang sa binuhi nga mga iro ug iring.

                        -o0o-

            Kon taas na kaayo ang linya sa mga pasyente sa imong pag-abot sa Abellana, pahimusli una ang ubang mga pangalagad nga wa kaayo maghuot aron nga di ka magpaabot og dugay una makapahimus.  Apil sa mas sayon nga linyahan mao ang mosunod nga mga pangalagad:

·        Libreng cholesterol test, complete blood count, fasting blood sugar, urinalysis, blood typing ug ubang laboratory services sa Chong Hua Hospital, Perpetual Succor Hospital, Hi-Precision Diagnostics, Guillamac Diagnostics and Medical Laboratory; ug

·        One-stop shop sa mga pangalagad sa kagamhanan sama sa Department of Foreign Affairs ug National Statistics Office.

                       -o0o-

           Mas mapuslanon ang libreng seminars kon mahibaw-an daan ang schedule ug room assignments:

·        Dunay duha ka sesyon sa Housing Loan seminar sa Pagibig sa alas 9-11 sa buntag ug alas 1:30-3:30 sa hapon;

·        Alas 6:30 sa buntag magsugod nang Smoking Cessation Seminar sa Department of Health;

·        Alas-10 sa buntag ang seminar nga "Kuwarta sa Blogs ug New Media;"

·        Buntag magsugod ang seminar sa special diet nga manghatag sab og vegetarian food sa Geltech Hayco Inc.; ug

·        Hapon ang preview sa IELTS Seminar ni Tisha "Inday Tikay" Ylaya.

                       -o0o-

           Gipaabot nga mag-awas ang mga aplikante sa Kapamilya Local Job Fair sa Cebu Chamber of Commerce and Industry ug Department of Manpower Development and Placement nga motanyag og kaliboan ka kahigayonan sa trabaho.  Makabentaha kon magpa-rehistro ug magpa-screen daan sa DMDP sa wa pay Sabado aron makapatuyang sa pagpangaplay sa labing daghang employers.

            Si Fidel Magno, pangu sa DMDP Cebu City, mopahigayon og job search sa alas-10 sa buntag aron pagtabang pag-andam sa mga aplikante ug pagpalambo sa ilang kahigayonan nga madawat.  Matod ni Magno himuon sab ang pre-employment seminar nga tambongan sa mga representante sa Department of Labor and Employment, mga magpapatigayon ug mga mamumuo aron pagtuki sa mga lagda sa pamuo ug pagtakdo sa gipangita sa mga industriya ug sa katakos ug kasinatian sa mga aplikante.  [30]  leo_lastimosa@abs-cbn.com

Arangkada of Leo Lastimosa for June 17, 2010

                        Grand Halad sa Kapamilya

 

            Sa makausa pa, mangahas na sab mi pagtanyag sa among kaugalingon isip taytayan tali sa mga may katakos sa pagtabang ug sa mga labing tabanganan.  Ipahigayon tibuok adlaw karong Sabado, Hunyo 19, ang labing dakong piyesta sa libre nga pangalagad dinhi sa Sugbo.  Ang Grand Halad sa Kapamilya ipahigayon sugod sa alas-6 sa buntag sa Abellana National School sa Osmena Blvd. sa Dakbayan sa Sugbo.

            Karon pa lang, nagtumpi nang mga tanyag sa tabang nga among nadawat.  Aron pagtino nga mahupong sa pangalagad ang kaliboan ka mga Sugbuanon nga magtultol ning kalihokan kaduha matag tuig, matag Hunyo ug Nobyembre.  Karong buwana, ang Halad gipahinungod sa ika-15 nga sumad sa pagsugod og sibya sa DYAB Abante Pa, Bisaya.

-o0o-

            Nia ang pasiunang listahan sa mga pangalagad nga kapahimuslan sa Grand Halad sa Kapamilya karong Sabado:

·        Kapamilya Local Job Fair nga motanyag og kaliboan ka kahigayonan sa trabaho, job search ug pre-employment seminar ug gipasiugdahan sa Cebu Chamber of Commerce and Industry (CCCI) ug Department of Manpower Development and Placement (DMDP) sa Kagamhanan sa Dakbayan sa Sugbo;

·        Kapamilya Medical ug Dental Mission nga motanyag og libreng konsultasyon, ibot sa ngipon ug mga tambal ug gipasiugdahan sa Bantay Bata 163 uban sa boluntaryong mga doktor sa Cebu City Medical Center (CCMC), LH Prime Medical Clinic, Philippine Gospel Association ug Philippine Academy of Family Physicians, nursing students sa University of the Visayas (UV) ug University of Cebu (UV) ug tambal sa Department of Health (DOH);

·        Kapamilya Optical Services nga maglakip sa paghiling sa mata ug reading eyeglasses pinaagi sa Lions Medical Eye Bank ug sa Fernandez Eye Clinic;

·        Kapamilya Laboratory Services uban sa Chong Hua Hospital, Perpetual Succor Hospital, Hi-Precision Diagnostics, Guillamac Diagnostics and Medical Laboratory ug Reactive Medical Laboratory and X-Ray;

-o0o-

·        Kapamilya Veterinary Services sama sa pagbakuna, pagkapon, pagpurga, paghatag og bitamina ug pagrehistro sa mga iro ug iring uban sa Philippine Veterinary Medical Association-Central Visayas Chapter, Island Rescue Organization (IRO) ug SWU-CVM clinicians pinangulohan nilang Cebu City Veterinarian Dr. Alice Utlang ug Dr. Rey del Napoles sa HIS;

·        One-stop shop sa mga pangalagad sa kagamhanan sama sa housing loan seminar sa Pagibig sa Cebu City ug Mandaue City ug mga pangalagad sa National Statistics Office (NSO);

·        Pagpatilaw sa vegetarian food ug pagpahigayon og special diet counseling sa Geltech Hayco Inc.;

·        Masahe sa Bright Path Association (kahugpongan sa mga napagngan sa panan-aw) ug reflexology sa San Jose ug San Roque Reflexologists; ug

·        Printing services sa CGS Printers ug Lexmark Research and Development Corp.

-o0o-

            Kon may katakos ug tinguha ka sab sa pagtabang, palihug tawga ang DYAB sa 4221950, 422195 ug 4221954.  O i-text sa 09228227133.  Daghang salamat daan.  [30]  leo_lastimosa@abs-cbn.com

Arangkada of Leo Lastimosa for June 16, 2010

                        Kutob ra sa pasidaan

 

            Ang ubang mga nasud naglisud-lisod sa ilang kaugalingon pagsulbad sa samang mga suliran nga sayon kaayo natong naatiman.  Giputos nila og pikot nga pukot ang ilang mga bukid ug mga bakilid aron kapanalipdan ang ilang mga molupyo gikan sa mangahug o manligid nga mga bato.  Mas yano ang atong sulbad—igo lang natong gibutangan og pahibawo nga, "Beware of falling objects."

            Ang ubang mga nasud naningkamot pag-ayo paghimong mas luwas sa mga dapit nga kasagarang mahitaboan sa mga aksidente sa mga sakyanan.  Mahimong pinaagi sa pag-usab sa mga lagda sa trapiko o pagbalhin gyod sa agianan.  Mas brayt ang atong sulbad.  Igo lang tang magbutang og signage nga, "This is an accident prone area."

-o0o-

            Ang mga paniid sa ibabaw iya ni Sammy Darza, kanhi tsirman sa Citom, kinsa nasubo pag-ayo sa batasan sa kadagkoan sa kagamhanan sa pagpangita sa labing sayon nga lusot inay sa tinuoray nga kasulbaran sa mga suliran.  Matod ni Darza kining laksot nga taras maoy hinungdan sa nagsubli-subli nga dagkong katalagman.  Kay nagdumili ang kagamhanan pagkat-on og mga pagtulon-an sa nangaging susamang mga disgrasya.

            Ang pagkahagbong sa bus sa pangpang sa Cansomoroy, Balamban niadtong Dominggo nga nikalas og 21 ka kinabuhi, 20 nila Iranians, di maoy una.  Ug nahadlok kong di maoy kataposan.  Daghan nang mga sakyanan ang nadisgrasya ug mga kinabuhi nga nakalas sa samang pangpang ug kasilinganang mga dapit.  Apan dugang pasidaan sa kakuyaw sa dapit ray nahunahunaang sulbad sa kagamhanan.

-o0o-

            Nisugyot si Darza og mas epektibo nga solusyon.  Matod niya angayng sundon ang gihimo sa Estados Unidos ug ubang kanasuran paghimong mas luwas sa ilang kadalanan nga lugsungon ug nagliku-liko tuyok sa kabukiran o subay sa tampi sa lawom nga mga pangpang:  Pagpahak sa kabahin sa bukid ug pagbutang og bas sa napatag nga bahin aron nga mamahimong likoanan sa mga sakyanan nga mawad-an og brake o giya samtang manglugsong o moliko sa lawom nga mga lugot.

            Matod ni Darza ang humok nga bas mopahunong sa sakyanan.  Busa makalingkawas ang mga pasahero gikan sa mas dakong kadaot kon, sama sa bus sa Balamban, molayat sila sa bung-aw.

-o0o-

            Giawhag sang Darza ang DPWH sa pagsusi sa bakilid kaayong mga bahin sa Trans-Central Highway nga nagsumpay sa Dakbayan sa Sugbo sa kasadpang kalungsoran.  Matod niya may mga dapit nga, sama sa nahitaboan sa labing uwahing trahedya, di na gyod luwas nga agian.

            Wa na si Darza sa kagamhanan.  Di nang kapatuman sa mas makiangayong mga sugyot paghimong mas luwas sa kadalanan.  Hinaot nga ang mga tampo nilang Darza ug ubang nagpakabanang mga Sugbuanon makapabuka sa mga mata sa kadagkoan sa kagamhanan.  Nga mas mapuslanon paglikay sa dugang katalagman ang pagpanalipod, inay pagpasidaan lang, sa katawhan.  [30]  leo_lastimosa@abs-cbn.com

Arangkada of Leo Lastimosa for June 15, 2010

                        Alas sa Celtics

 

            Si Kobe Bryant na say gibasol sa pagka pilde sa Los Angeles Lakers sa Game 5 ug sa pag-abante sa Boston Celtcis, 3-2, sa NBA Finals.  Gitulisok siya kay wa na sab mamasa sa bola sa 3^rd quarter.  Kanus-a naka-iskor siya sa 19 sa iyang 38 puntos.  Apan niburot sang labaw sa Celtics ngadto sa 11.  Unom ray biya sa Lakers sa wa pa makalimot si Kobe sa iyang mga kauban.

            Gisamot pagduot ni Phil Jackson si Kobe pinaagi sa pagtumbok sa daghan niyang turnovers (4 sa 13 ka usik nga bola sa Lakers) ug sa kakuwang nila og assists (12 sa Lakers batok sa 21 sa Celtics).

-o0o-

            Si Kobe wa moitsa sa dakong bahin sa 1^st quarter.  Nagsige siya og pasa sa bola.  Apan ang iyang kaubanan nakapasud lag 33% sa ilang shots.  Mas daghang possessions ang Lakers apan mas hingigo ang Celtics (65%).  Diha na moitsa si Kobe dayong tapos sa quarter nga nakalaslas sa labaw sa Celtics ngadto sa duha.

            Mas usikan og bola si Rajon Rondo (7 ka turnovers) apan mas daghan og assists (8 batok sa kang Kobe nga 4) ug gipakauwawan niyang salida ni Kobe sa 3^rd quarter pinaagi sa iyang mas kulba hinam nga mga duwa sa 4^th.

-o0o-

            Di hingpit nga matulisok si Kobe sa pagkawagtang sa iyang kaubanan.  Wa na silang igkita sa wa pa siya mobanos sa 3^rd quarter:  Usa ka rebound ray nahimo ni Andrew Bynum, ang labing dakong magduduwa sa korte, sa 31 ka gutlo nga duwa; gihilantan si Lamar Odom (8 puntos ug 8 ka rebounds); ug nangamig sa kabugnaw si Derek Fisher (duha ray napasud sa siyam ka shots).

            Si Ron Artest ang labing dakog atraso.  Gawas nga duha ray napasud sa siyam ka shots, nga ang labing kahibudngan nga sipyat mao ang duha ka free throws dayong tapos sa duwa, inutil pa gyod sa pagbaraw sa nag-alintabo nga si Paul Pierce.  Si Pau Gasol ray makapataas sa iyang agtang (12 puntos ug 12 ka rebounds).

-o0o-

            Ang konsuylo sa Lakers mao nga mobalik na sila sa Staples Center.  Ang ilang homecourt mahimong makapalagsik sa mga tuhod nilang Kobe ug Bynum, makapahuwas ni Odom ug makapainit og balik nilang Fisher ug Artest.

            Apan ang Game 5 nakapahinumdom sa 2008 finals.  Kanus-a ang mas maayong team (Lakers) gikulata sa mas determinadong team (Celtics).  Mas makapabalaka alang sa Lakers:  Wa pay duwa sa 2010 finals nga nagdungan og silaob silang Kevin Garnett, Ray Allen, Pierce ug Rondo.  Sa Game 2 ra namuntos si Allen ug sa Game 5 ra nakabuylo si Garnett.  Sa ilang pagdaog sa Game 4, mga reserba (Glen Davis ug Nate Robinson) ray nisakwat sa Celtics.  [30]  leo_lastimosa@abs-cbn.com

Arangkada of Leo Lastimosa for June 14, 2010

              Goryo-Goryo ni Soc

 

            Kon wa kahibawo si Talisay City Mayor Socrates Fernandez nga ubos sa kustodiya sa kapolisan ang sakyanan sa iyang anak nga si Joavan, kon wa siya kakita sa police line palibot sa sakyanan, ug kon wa siya badlonga sa nagbantay nga kapolisan, nganong wa man niya kabay-i ug gipauli ang tibuok sakyanan, inay pagpanaginot lang og kuha sa gamay nga puwa nga bag sa babaye?

            Kon way gitagoan, nganong wa man niya ipakita sa kapolisan, sa konsehal ug duha ka barangay tanod sa Lawaan 3 ug sa naglibot nga mga molupyo ang sud sa bag nga iyang gikuha ug ang uban pang butang sa sakyanan sa way pagpaabot sa search warrant?

-o0o-

            Kon di iya ni Joavan ang pistola nga nakuha sa kapolisan gikan sa sakyanan, kinsa may nagbutang ug kanus-a man gibutang?  Di ba (1) gikandadohan man ang sakyanan dihang niawhag ang nipasangil nga gitionan ni Joavan nga siksikon ni sa kapolisan ug (2) diha na man mogawas ang yawe (dala sa sinugo ug representante ni Mayor Fernandez nga si Nito Fernandez) dihang nihulga nang kapolisan pagbuak sa bildo sa sakyanan?  Kon mga polis ang nagbutang sa pistola, giunsa man nila paglipat silang Konsehal Frederick Marababol ug ang duha ka tanod?

            Kon manghunaw si Joavan og kalambigitan sa mga butang sud sa iyang sakyanan, nganong nakapaneguro man nga gibutang-butangan siya og pistola?

-o0o-

            Kon nagtuo silang Mayor Fernandez ug Joavan nga giinitan ug giapiki lang sila sa kapolisan, (1) nganong wa man dayon molihok ang mga polis dihang nagpalaban nila si Vincent Castrodes nga gitionan siyang Joavan, (2) nganong wa man babagi sa mga polis sa Mayor Fernandez sa iyang paglapas sa police line ug (3) nganong wa man nila posasi ang mayor dihang giablihan ang pultahan sa sakyanan ug gikuha ang bag?

            Kon nagduda si Mayor Fernandez nga lain na sab ning butang-butang sa iyang politikanhong mga kaatbang, haskang lisorang tuohan nga si Castrodes sinugo ni Mayor Tomas Osmena.  O ni Raul Bacaltos.

-o0o-

            May sukaranan ang pagtandi sa pagdumili sa ni PRO 7 Chief of Staff Edgardo Ingking pagkuha og search warrant pag-abli sa sakyanan ni Congressman-elect Benhur Salimbangon bisan sa pasangil ni Bogo City Mayor Junnie Martinez nga may gitagoang daghang armas sa niaging piniliay ug sa kaagresibo ni CPPO Chief Erson Digal pagkuha og search warrant ug pag-abli sa sakyanan ni Joavan tungod sa pasangil ni Castrodes.

            Ning higayona, di na mabasol si Mayor Fernandez kon makumbinser nga labihang lubaya ni Ingking pagsusi may mga armas ba gyod sud sa gidudahang sakyanan sa Bogo kay sikit sa luwag sa Kapitolyo si Salimbangon samtang nangisog si Digal batok niya kay nahiagom og makauuwaw nga kapildehan si Gobernador Gwen Garcia sa Talisay.  [30]  leo_lastimosa@abs-cbn.com

Arangkada of Leo Lastimosa for June 13, 2010

                        Pagdagan o paglakaw

 

            Sa labing unang higayon, nagparehistro ko sa lumba sa dagan.  Sa among kaugalingong lumba.  Kon wa kaabot og napu ka tuig ang DYAB Kapamilya Run, di gyod unta ko magparehistro.  Wa pa gyod koy plano nga modagan.  Nagparehistro lang ko dihang gipamub-an ang labing mubo nga kategoriya gikan sa tulo ka kilometro ngadto na lang sa usa ka milya (1.6 ka kilometro) ug gitugotan ang mga mangapil nga manlakaw lang.

            Lipay kaayo ko pagkadawat sa akong singlet.  Gipatabanan pa sa akong numero (2,153), mapa ug mga lagda ug mga tugon sa lumba.  Pag-uli sa amo, nikalit lang ka-interesado ang akong asawa.  Maong naiya ang akong singlet ug kinahanglan kong magparehistro pag-usab.

-o0o-

            Mas daghang nagpalista alang sa among lumba karong tuiga.  Tungod tingali sa bag-o namong kaabag (Runcheck nga giduma nilang Kenneth Caquejo ug Annie Neric) o sa nagkadaghan nang mga Sugbuanon nga gustong managan.  O manlakaw.  Hapit tanang suod nakong higala nagpalista.  Pipila nila managan gyod.  Kasagaran, sama nako, manlakaw.  Ang uban nagsusi na gani unsay lamiang mga kan-anan sa Asiatown IT Park nga mangabli og sayo.

            Nanghinaot kong madugangan pa gyod ang magpalista.  Kay ang tanang matigom human sa cash prizes ug ubang gasto (kadto lang di na gyod mahangyo og ex-deal) igahin sa pag-ayo sa labing gubaon nga classrooms sa public schools sa Sugbo nga ilhon sa Departamento sa Edukasyon.

-o0o-

            Wa gyod koy problema sa dagan niadtong elementary pa.  Akoy hawod sa 100 meter dash sa among tulonghaan.  Naghimo pa gani og hurdles sa among tugkaran.  Wa hinuon kong nakaabot og provincial meet.

            Dugay na kong naghunahuna nga mobalik og dagan.  Tungod sa kahadlok nga modako ang akong tiyan.  Kasagaran gud sa akong nailhang kurakot nga opisyal sa gobyerno ug sakop sa media nagbusyad ang tiyan.  Apan nagsugod nag sakit ang akong tuhod.  Maong kutob lang ko sa lakaw.  Apan ang akong lakaw sa dan maoy gibasol sa akong asawa sa mga atake sa sinusitis nga nakapainutil nako sa pila na ka higayon.  Maong kutob na lang ko sa lakaw sa palibot sa among bay.

-o0o-

            Dihay higayon nga nagpasiugda ang DYAB og walking club.  Nga manlakaw sa IT Park ug dayon mangaon og cereal sa sayong buntag sa Dominggo.  Nagkakita mig pipila ka higayon.  Hangtod nga among naamgohan nga mas lisod ang pagmata og sayo kay sa pagbalibad sa mas mantekaon nga pamahaw.

            Apan kon maatlan ko sa IT Park o sa Cebu City Sports Center sa sayong buntag o sayong gabii, maibog ko sa kadaghan sa nakabuntog sa ilang katapol.  Bahala na kon pipila nila akong nahibaw-an nga mag-inasal gihapon inigka human.  Hinaot nga di pa uwahi ang tanan pagkuyog sa nagkadako nga kalihokan.  Sa pagdagan.  O paglakaw.  [30]  leo_lastimosa@abs-cbn.com