Arangkada of Leo Lastimosa for September 6, 2009

                        GAPOS SA KASAYSAYAN

 

            Tan-awa ra gud unsa kasubo ang kahimtang politikanhon sa nasud karon.  Bisan sa kabaho na sa pamunoang Arroyo, nga ang kinabag-an sa katawhan wa nay pagsalig niya, magpabilin gihapon siya sa gahom.  Kay ang iyang paggawong sa mga institusyon labihan kahingpit—nga mahimo gani siyang mopili pagtungkawo sa Malakanyang lapas sa 2010.

            Ang mga heneral laban niya.  Ang mga obispo amen niya.  Mga kongresista naa sa iyang bolsa.  Lokal nga mga opisyal nagbalaan niya.  Mga komisyonado sa Comelec utangan niya.  Mga maghuhukom sa Korte Suprema mga tinudlo niya.  Ang Ombudsman, Commission on Audit ug Civil Service Commission pulos under-the-bunal niya.  Ang katawhan na lay wa niya.

-o0o-

            Apan unsaon man pagbaraw sa katawhan sa iyang pagpahimus sa gahom?  Unsaon man nila pagpugos si Arroyo pag-ila nga sila ang agawon ug siya ila lang suluguon?  Unsaon man nila pagsakmit pagbalik ang sobereniya sa usa ka Haring Lungsod?

            Ang tubag?  Lisod.

            Di silang kapaabot og hustisya gikan sa mga hukmanan nga sipsip sa mga namunoan.  Di silang kapaabot nga labanan sa mga buhatan nga gitahasan unta pagbadlong apan nakigkonsabo na hinuon sa mga kawatan.  Di silang kalaom og ligdong nga piniliay.  Di silang kapangayo og tabang gikan sa kasundalohan ug kapolisan nga maayong pagkabansay-bansay paglingiw bisan sa labing makauuwaw nga kalapasan sa batakang balaod.  Di na gani silang kasalig sa kaligdong sa mga representante sa Labawng Makagagahom.

-o0o-

            Bisan ang mga institusyon nga nagbudhi sa katawhan, sama sa buhatan ni Arroyo, nanukad sa katawhan.  Magpabilin lang silang maglihok kon tugotan sa katawhan.  Sa ato pa, kon wa na sila magsilbi sa ilang mga gimbuhaton, sama ni Arroyo, mahimo silang kahinginlan sa katawhan.

            Apan masakmit lang pagbalik sa katawhan ang ilang gahom kon magkahiusa sila sa pagbarug ug paglihok.  Kon padayon nga magkatibuwaag, dali ra silang lipaton, dugmukon ug padayon nga pahimuslan.  Ang mga nagtungkawo sa gahom, inabagan sa kurakot nga mga institusyon, nagkombuya pagpig-ot sa bisan unsang kahigayonan nga magkahiusa sila sa pagpakabana.

-o0o-

            Sud na sa kapid-an ka katuigan, napugngan ang panaghiusa sa katawhan tungod sa ilang kakabos ug kaburong.  Ang kakabos nakaggapos nila sa hakog nga mga interes sa mga gamhanan ug adunahan nga maoy tinubdan sa ilang mga panginabuhi.  Ang kaburong maoy nipawong sa bisan unsang paglaom nga makahaw-as sila gikan sa kakabos.

            Bisan ang mga nakamatngon ug nagpakabana alang sa makiangayong kausaban wa makaikyas sa karaan na kaayong duwa sa ungu-ungo:  Kawatan bitaw ang mga namunoan, apan mas gutom ang mga naghigwaos pagpuli nila; busa mas maayo pang paabuton na lang nga mabusog ang mga gamhanan ug adunahan nang daan.  Nailad na ini ang atong katiguwangan.  Padayon bang ipaod sa samang pait nga kapalaran ang umaabot tang kaliwatan?  [30]  leo_lastimosa@abs-cbn.com

Arangkada of Leo Lastimosa for September 5, 2009

        BALILI GIDUPHAN?

    Karong gitataw na sa Department of Environment and Natural Resources (DENR) nga di kaabot og usa ka ektarya sa 25 ka ektarya nga luna nga napalit sa Kapitolyo gikan sa mga Balili sa Tinaan, Naga, moinsistir ba lang gihapon si Gobernador Gwen Garcia sa pagpadayon sa nangalisbo nga transaksiyon?  Panalipdan ba lang gihapon niya ang ilang hukom nga P38 milyones lang sa P99 milyones nga nabayad ngadto sa mga Balili ang ilang bakwion?

    Karong nabisto na nga pulos diay timberland ang ilang napalit, ipatuman ba lang gihapon ni Garcia ang ilang laraw sa pagtam-ok og coal ash, pagtukod og incinerator, paghimo og eco-tourism park, paghimo og reclamation project ginamit ang coal ash ug pagtukod og pantalan sa luna?

        -o0o-

    Karong gibutyag sa DENR nga nakahibawong mga Balili nga gipabasura nilang mga titulo sa luna niadto pang 1999, hapuhapon ba lang gihapon ni Garcia ang mga Balili ug pasidunggan pinaagi sa pagpabilin sa dakong bahin sa halin sa gidudahan nga pagpangilad?  Kanus-a man ipakita ni Garcia ang matinud-anong reaksiyon sa usa ka nabiktima sa ilad?

    Maglisod pagsabot ang Sugbuanong mga magbubuhis nganong mas giinitan sa Kapitolyo si Provincial Board Member Juan Bolo, samtang gitino nga magpabilin sa mga Balili ang ilang kuwarta.  Kon kabahin sa pagpangilad si Bolo, angay siyang silotan.  Apan ang mas bug-at nga sagpa, ug ang kinakusgang kasaba sa Kapitolyo, itagana gyod unta ngadto sa nangangkon nga mga tag-iya sa luna nga naa pa ilawom sa dagat.

        -o0o-

    Ang pagduda nga may tinagoan ang Kapitolyo ug ang mga Balili nisamot paglig-on sa pagkabutyag nga ang duha ka tseke nga gipirmahan ni Garcia paghingpit sa pinalitay sa luna giluwatan sa ngan ni Atty. Romeo Balili, di sa kabtangan ug sa mga sumusunod sa namatay nga si Engr. Luis Balili.  Tungod ini, si Provincial Treasurer Roy Salubre mismo niangkon nga mahimong gastuhon ni Atty. Romeo Balili ang kuwarta sa way pagpananghid sa biyuda nga si Amparo Balili ug sa ubang mga sumusunod ni Engr. Luis Balili.

    Butangi!  Gitugyan ni Garcia ang P98.9 milyones ngadto sa abogado nga niangkong na-coma sud sa 16 ka takna ug di na gani usahayng kaila sa iyang kaugalingong mga anak?

        -o0o-

    Nga posibleng maoy hinungdan ning laing sekreto nga akong ikumpisal.  Ang labing unang kasayuran nga nadawat sa media labot sa tagulilong nga luna sa mga Balili naggikan sa nagpailang mga sakop sa Pamilyang Balili.  Nangreklamo sila sa kaggamay sa ilang bahin gikan sa multi-milyones pesos nga transaksiyon.

    Pipila ka sakop sa media nipada sa suwat sa nangreklamong mga Balili ngadto sa Visayas Ombudsman.  Dugay na.  Pila ka buwan sa wa pa moulbong eskandalo.  Nakatag-an mo, giyak-an sa Ombudsman ang kasayuran.  Hangtod nga giangkon sa Kapitolyo nga dagat gyod diay ang ilang napalit.  [30]  leo_lastimosa@abs-cbn.com

Arangkada of Leo Lastimosa for September 4, 2009

        KUGTONG RAY GINANSIYA

    Kon wa pa kang kabantay, may panagang nga gihanig nang daan sa kadagkoan sa Kapitolyo.  Aron di sila mabalhog sa bilanggoan sa ilang pagwaldas sa P98.9 milyones alang sa luna sa mga Balili nga naa pa ilawom sa dagat.  Kini mao ang pag-insistir nga wa maalkanse ang Sugbuanon sa maong transaksiyon.

    Niang mosunod nga mga pangangkon ni Gobernador Gwen Garcia:  Nga napu ka parselang luna ray gibayran apan nabalhin sab sa ngan sa Kapitolyo ang ika-11 ka parsela nga duna lay tax declaration; nga nalaslasan niyang presyo ngadto sa P400 matag metro cuadrado; ug nga kapuslan ang luna isip pantalan, incinerator ug eco-tourism park.

        -o0o-

    Mao ra tinuod ni nahibiling lusot sa Kapitolyo.  Kay bisan mauli pang tanan nilang nabayad ngadto sa mga Balili (nga makapabisto sab kinsay naka-komisyon sa nangalisbong transaksiyon), nahimo nang krimen.  Nahingpit nang transaksiyon nga nakapausik sa hinagoan sa mga magbubuhis.  Maong kinahanglan nilang panalipdan nga makiangayon ang transaksiyon.

    Lisod hinuong kumbinsihon ang mga Sugbuanon nga nakaginansiya sila sa pagbayad sa Kapitolyo sa pagatpatan nga, ubos sa balaod di mahimong matitulohan ni mabaligya, ug fish pond nga gidudahang ilegal nga na-convert gikan sa pagka timberland.  Gawas lang kon kapamatud-an nga balor og binilyon ka pesos ang mga kugtong ug ukoy ilawom sa dagat nga ilang gibayran og minilyon.

        -o0o-

    Ang mga pangangkon ni Garcia, inay makatabang, makapasamot hinuon pagdaot sa ilang kawsa:

• Ang managlahing gidak-on sa luna nga gitakda sa resolusyon sa provincial board (PB) ug sa memorandum of agreement nga gipirmahan ni Garcia uban sa mga Balili nakapatataw sa panginahanglan pagbalik sa MOA ngadto sa PB alang sa ratification ug ang kapakyas paghimo ini nakapahimutang sa pagduda sa kabalido sa kinatibuk-ang transaksiyon; ug
• Di tinuod nga napabarato ni Garcia ang luna kay ang iya ra sang buhatan (pinaagi sa appraisal committee) ang nipaburot sa presyo ngadto sa P610 matag metro cuadrado bisan gitanyag sa mga Balili og P256 lang niadtong 2003.

        -o0o-

    Wa pa gyod sila motagam.  Inay mapaso na sa nabulilyasong transaksiyon, ang Kapitolyo nangulitawo pa gyod og laing katalagman---ning higayona batok sa kinaiyahan.  Nitanyag paggamit sa luna isip tam-okanan sa coal ash gikan sa Kepco.  Bisan sa pasidaan sa mga siyentipiko nga ang coal ash, nga kon sunugon na mopilu-pilo hangtod ka-napu ka higayon sa kabagtok sa uranium and thorium,  mas radioactive pa kay sa basurang nukleyar.

    Nakugang ang mga imbestigador sa Visayas Ombudsman ug Department of Environment and Natural Resources (DENR) nga gisugdan na pagtam-ok ang coal ash sa napalit nga luna sa mga Balili sa Tinaan, Naga.  Bisan sa pasidaan sa environmentalists sa kadaot ngadto sa kahimsog sa mga molupyo sa palibot.  Ug bisan wa pa silang kakuha og permiso gikan sa Environment Management Bureau (EMB).  [30]  leo_lastimosa@abs-cbn.com

Arangkada of Leo Lastimosa for September 3, 2009

                        NOY UG MAR

 

            Mga alas ni Senador Benigno "Noynoy" Aquino III isip kandidato pagka presidente:

·        Lahi siya sa uban nga mga kandidato nga nakagasto na og minilyon ka pesos pagbaligya sa ilang kaugalingon ug nakahimo nag bisan unsa na lang pamostura aron madapit ang pagtagad sa mga botante;

·        Siya ra ang makapangangkon nga nidagan tungod sa sibaw nga awhag sa katawhan;

·        Wa siya mahilambigit sa bisan unsang eskandalo dihang presidente pa ang iyang inahan, dihang kongresista pa siya sa Tarlac ug karong sakop siya sa Senado; ug

·        Anak siya ug busa makapangangkon nga matinud-anon nga mosunod sa talagsaong pangalagad nilang Ninoy ug Cory.

                        -o0o-

            Apan ang daotang balita sa mga nangandoy nga buhi pang Cory Magic, may mga dos kamunggay sab si Noynoy:

·        Nihit ang iyang napasaka nga mga balaodnon sa siyam ka tuig niya sa House ug sa una niyang termino sa Senado ug, segun sa iyang kaugalingong website, way bisan usa nila nga napasar;

·        Di siya lantip nga manulti, layo ra sa makapaukyab nga mga pakigpung sa iyang amahan ug bisan sa di kaayo nindot apan larino gihapong mga pakigpung sa iyang inahan; ug

·        Sa kadaghan sa kababayen-an nga nahilambigit niya apan wa pa gyod maminyo hangtod karon, mahimo siyang kapasanginlan nga dugayng makaumol sa iyang baruganan.

                        -o0o-

            Mga alas sa pagtahan ni Senador Mar Roxas sa iyang ambisyon nga mag-presidente aron pagpaluyo sa kandidatura ni Noynoy:

·        Ang pagpahibawo sa iyang hukom sa wa pa mabutyag ni Noynoy kon modagan ba o dili pagka presidente nakapalambo pag-ayo sa pagdayeg sa katawhan sa ligdong nga pamolitika ni Mar;

·        Ang pagsibog sa iyang kandidatura bisan sa minilyon ka pesos na nga naggasto sa pasiunang kampanya nakapakumbinser sa mga botante sa iyang pangangkon nga gipalabi niya ang nasud kay sa iyang personal nga interes; ug

·        Kon tungason ang iyang kandidatura pagka presidente, higanteng katalagman na lay makapugong niya nga ma-bise presidente.

                        -o0o-

            Apan di makapaabot si Mar nga moduyog ang tanan sa iyang pangasaw-unon nga si Korina Sanchez sa pagpatu sa ilang luha sa kahinugon:

·        Wa mosaka ang iyang ratings bisan sa padyak-padyak, nalansang gihapon ang ratings bisan gitakda nang ilang kasal, siyarog di gihapon molambo ang iyang popularidad karong mag-sidekick na lang siyang Noynoy;

·        Andam gyod diay si Mar nga mag-presidente ug sa pagpangu sa nasud ug sa katawhan kay, tungod lang sa pagtumaw sa mas popular nga piliunon, nisibog ug nitahan man dayon;

·        Ang kadudahan nga tayming sa pagtakda sa kasal nilang Korina pila ka buwan sa di pang piniliay nabaraw sa kamatayon ni kanhi presidente Cory Aquino; ug

• Masuko ang Tau Gamma fraternity sa ngan sa bag-ong tandem—AqRo.  [30]  leo_lastimosa@abs-cbn.com

Arangkada of Leo Lastimosa for September 2, 2009

                        P21.5M ANG PATONG?

 

            Labing menos P80 milyones nay bawion sa Kapitolyo gikan sa mga Balili.  Kini kon tumanon ni Gobernador Gwen Garcia ang awhag ni Provincial Board (PB) Member Victor Maambong nga apilon pagbawi ang bayad sa 10 ka ektaryang fish pond sa kontrobersiyal nga luna sa Tinaan, Naga.

            Nisukwahi si Maambong sa pag-insistir sa mga abogado sa Kapitolyo nga mahimong titulohan ang fish pond.  Matod niya ilegal ang pagbuutbuot sa mga Balili paghimo nga fish pond sa luna nga giila sa nasudnong kagamhanan nga timberland.  Nipasabot si Maambong nga law-ay kon mamugos ang Kapitolyo legal ang mga titulo bisan klaro na nga nailad sila sa tinuorayng kahimtang sa napalit nga yuta.

                        -o0o-

            Kon matuman si Maambong, P18 milyones na lang ang mahibilin sa mga Balili.  Ug sa tanang nakabahin sa gilaktod nga transaksiyon.  Taga Kapitolyo man o taga pribadong sektor.  Nga makiangayon lang.  Kay di man sab gyod malalis nga lima ra ka ektarya ang uga.

            Mas makiangayon pa gani kon bawion na lang sa Kapitolyo ang kinatibuk-ang P98.9 milyones, nga hinagoan sa kabos nga Sugbuanong mga magbubuhis, human makanselar ang kinatibuk-ang transaksiyon.  Klarong nailad ang Kapitolyo kay lisod tuohan nga wa kahibawo ang mga Balili sa nahimutangan sa ilang luna.  Kapasanginlan lang sila si Gobernador Garcia ug kaubanan nga konsabo sa pangilad kon mawili lang gihapon pagtahan sa nangalisbo nga pinalitay.

                        -o0o-

            Nagpaila nga lisensiyado nga real estate broker, nga giingong usa sa gitahasan sa mga Balili pagpangita og mopalit sa ilang luna, nipahibawo nako nga unang gitanyag nga ibaligya ang kabtangan niadtong Disyembre 2003.  Mas ubos ang presyo, P65 milyones, o P256 matag metro cuadrado.  Apil sa ilang gitanyagan mao ang Kepco sa kantidad nga P85 milyones, ang patong nga P20 milyones alang sa buhis ug bahin sa mga naghikay sa transaksiyon.

            Apan nabaraw ang sabot kay, matod niya, niapil ang Kapitolyo.  Bisan silay lisensiyado, wa silay dag-anan sa kolorum nga mga ahente tungod lang kay naghupot sa tag-as nga katungdanan sa kagamhanan.

                        -o0o-

            Mao diayng nisutoy ang presyo ngadto sa P430 matag metro cuadrado.  Nga gipaburot sa appraisal committee ngadto sa P610.  Sa wa pa ta ulug-ulogi nga nalaslasan ang presyo ngadto sa P400.  Gihatagan mi niyag kuwentada diin padung ang P98.9 milyones nga gipahibawo sa Kapitolyo nga gipagawas sa transaksiyon:

·        P65 milyones ang nadawat sa mga Balili;

·        P4.9 milyones ang komisyon sa ahente;

·        P5.9 milyones ang capital gains tax; ug

·        P1.5 milyones ang documentary stamp tax.

            Sa ato pa, P77.4 milyones ray kinatibuk-ang naggasto.  Mao nga nangutana siya:  Hain mang sobra nga P21.5 milyones?  Lisod tuohan nga nalunod ang kuwarta sa ilawom sa dagat.  Mas katuohan nga may niburot nga pribadong mga bolsa.  [30]  leo_lastimosa@abs-cbn.com

Arangkada of Leo Lastimosa for September 1, 2009

                        LABOK SA OMBUDS

 

            May sukaranan ang reklamo ni Assistant Ombudsman Virginia Palanca-Santiago sa kalangay sa Commission on Audit (COA) paghatag sa sangpotanan sa ilang pagsubli sa kontrobersiyal nga pagtukod sa Cebu International Convention Center (CICC).  Kay lisod nga tinuod nga ipatin-aw ang padayong paghikaw sa ilang audit report gikan sa graft investigators sa Visayas Ombudsman.

            Gawas kon, sama ni Visayas Ombudsman Pelagio Apostol, nakaplagan nila ang transaksiyon sa CICC nga labihan ka-komplikado ug busa abtan una silag siyam-siyam una mahingpit ang pagsubli.  O kon, sama ni Apostol, kumbinsido ang COA nga di kamao ang graft investigators busa way kapuslanan ang paghatag nilag kopya kay di ra man gihapon makasabot sa audit report.

-o0o-

            Mas lisod sabton nganong pila ka tuig human natukod ang CICC, ang Ombudsman kutob lang gihapon sa pagyawyaw sa kalisod sa ilang imbestigasyon.  Inay magpalaban sa mga sakop sa media, nganong di man gamiton sa Ombudsman ang ilang gahom pagpugos sa COA paghatag nila og kopya sa audit report sa CICC?

            Sa samang paagi, naglibog pa ko hangtod karon nganong ang Ombudsman, pinaagi sa ilang kinaham nga whistleblower nga si Cris Saavedra, nangayo og kopya sa mga dokumento sa CICC nga gitugyan ni Gobernador Gwen Garcia ngadto sa Kapisanan ng mga Brodkaster ng Pilipinas (KBP) Cebu Chapter.  Nakalimot ba nga duna silay gahom pagsupina sa tanang mga dokumento sa CICC gikan sa buhatan ni Garcia?

-o0o-

            Maong magpakitabang mi nimo sa pagpangaliya.  Nga unta makaangkon ang Ombudsman og igong kaisog sa pagtinuod gyod pagsusi sa pagpalit sa Kapitolyo sa luna sa mga Balili sa Tinaan, Naga nga naa pa sa ilawom sa dagat.  Kay kon mahawongan lang sila ni Garcia ining kasoha, manguros na lang tang daan.

            Bisan niangkon na si Garcia og responsibilidad sa pagpagawas sa P98.9 milyones nga bayad sa mga Balili bisan wa pang kakita sa mga titulo sa yuta, ug sa way pagsusi asa gikan ug hangtod asa kutob ang kabtangan, mahimong wa lang gihapoy bisan usa nga mapasakaan og kaso.  Kay unsaon man pag-irog sa kaso kon, sama sa naandan, yak-an lang sa Ombudsman.

-o0o-

            Ang kadagkoan sa Kapitolyo maoy labing nasuhito sa kainutil sa Ombudsman.  Nga kon pasagdan ang Ombudsman, mahimong lawalawaan na sab ang kaso ug mapasanginlan sa Sugbuanong mga magbubuhis nga nagkonsabo silang tanan.  Labaw sa tanan, makaikyas ang tanang hingtungdan, labi na si Provincial Board (PB) Member Juan Bolo.

      Maong ang PB ug ang buhatan ni Garcia mora og naglumba paglusad sa ilang buwag nga mga imbestigasyon.  Bahala na kon, sa ilang kahigwaos pagpangita og lain nga matulisok aron pag-absuwelto sa ilang kaugalingon, nakalimot nga nagmugna sila og mas dakong eskandalo—ang mga imbestigahunon mao ra say nangimbestigar sa ilang kaugalingon.  [30]  leo_lastimosa@abs-cbn.com

Arangkada of Leo Lastimosa for August 31, 2009

                11 KA PANGUTANA

 

            Nakadawat ko sa pagdapit ni Gobernador Garcia sa iyang briefing karong Miyerkules mahitungod sa nabulilyaso nga pagpalit sa Kapitolyo sa luna sa mga Balili nga naa pa ilawom sa dagat sa Tinaan, Naga.  Ang akong mga gimbuhaton sa ABS-CBN, nga maoy nagsuweldo nako, mahimong makapugong nako sa pagtambong.  Apan maningkamot ko nga makaipsot sa among sinemana nga department heads meeting.  Maneguro na lang hinuon kong daan.  Kon di gyod kong katungha, niang akong 11 ka pangutana alang ni Garcia ug sa ubang kadagkoan sa Kapitolyo:

·        Nganong wa may appropriation ordinance nga labihan mang dakoa sa P98.9 milyones nga gipalit sa luna nga wa pa igkita?

·        Kon gikuha ang gahin gikan sa 20% nga local development fund, nihaom ba ang pagpalit sa dagat, pagatpatan ug fish pond sa provincial development plan?

-o0o-

·        Nganong hangtod karon wa man siloti ang mga sakop sa appraisal committee bisan nasakpan na nga nitago gikan sa Cebu Provincial Board sa kasayuran gikan sa technical working committee nga nagbutyag nga ang luna sa mga Balili dunay fish pond ug pagatpatan?

·        Tinuod ba nga usa sa mga hinungdan sa pagdumili sa Kapitolyo pagkanselar sa tibuok transaksiyon ug pagbakwi sa kinatibuk-ang P98.9 milyones mao nga nadawat na ni Garcia ang pasiuna sa $1 milyon gikan sa Kepco SPC?

·        Tinuod ba nga ang laing hinungdan sa pagdumili sa Kapitolyo pagkanselar sa transaksiyon mao nga mabawi lang ang kinatibuk-ang kantidad pinaagi sa pag-ila sa tanang nakabahin?

-o0o-

·        Taphaw ba diay ang sistema sa Kapitolyo nga sayon ra man kaayong nalusutlusotan ni PB Member Juan Bolo, o mao ni ang naandan apan karon lang nasakpan?

·        Mopirma ba lang diay si Garcia og mga dokumento bisan wa mapirmahi sa mga departamento sa Kapitolyo nga mao untay gitahasan sa pag-andam sa maong mga dokumento?

·        Nganong nagdalidali man pagpirma si Garcia sa MOA sa way pagpaabot sa ikaduhang resolusyon sa PB nga nipatigbabaw na sa iyang gipangayo nga mas ubos nga presyo sa luna?

-o0o-

·        Nganong nagbuutbuot man ang buhatan ni Garcia sa wa pag-uli sa memorandum of agreement (MOA) uban sa mga Balili ngadto sa PB alang sa ratification, inay hatagan untag kahigayonan ang PB pagsubli kon ang MOA nihaom ba sa ilang resolusyon pagtugot ni Garcia pagpalit sa luna?

·        Kay wa may ratification bisan sa kalainan sa presyo ug gidak-on sa yuta nga gitakda sa resolusyon ug sa MOA, nagpasabot ba ni nga ilegal ang pagpagawas sa P98.9 milyones nga bayad sa mga Balili?

•           Pila na ba ka ektaryang yuta ang napalit sa Kapitolyo sukad sa pag-asumir ni kanhi gobernador karon Kongresista Pablo Garcia niadtong 1995, wa ba say laktod sa pagpamalit ug napuslan na ba silang tanan?  [30]  leo_lastimosa@abs-cbn.com

Arangkada of Leo Lastimosa for August 30, 2009

                        BANA NI LUMEN

 

            Si anhing Lumen Durano nakapasar sa pasulit sa DTI isip real estate broker tulo ka tuig ang nilabay.  Human nakuha ang iyang lisensiya, nalingaw na siya sa paghikay sa nagkalainlaing mga transaksiyon sa yuta.  Ang iyang kaubanan sa propesyon kasagaran magtapok sa ilang bay sa Bulacao, Talisay City.  Apan wa siya mabantog sa iyang kamalampuson.  Gani gisungog siya sa iyang bana nga mao ray ahente nga way halin.

            Hangtod nga gipahibawong mga Sugbuanon nga siyay ahente sa labing kontrobersiyal nga transaksiyon sa yuta sa Sugbo sa niaging tuig:  Ang pagpalit sa Kapitolyo sa 25 ka ektaryang luna sa mga Balili, nga ang 20 ka ektarya naa ilawom sa dagat.

-o0o-

            Si Cebu Provincial Board Member Juan Bolo nakapasar sa pasulit sa DTI pagka real estate broker niadtong 1989.  Gipahibawo hinuon sa DTI nga sa labing uwahing listahan sa lisensiyadong real estate brokers wa na maapil ang ngan ni Bolo.  Ang gituohang wa na paglab-as ni Bolo sa iyang lisensiya wa makapugong sa iyang talagsaong kalamposan sa nagkalainlaing mga transaksiyon sa yuta nga iyang giapilan—may pagtugot man o wa sa Kapitolyo, ginamit man o di ang ngan ni Gobernador Gwen Garcia.

            Sa wa pa moulbong kontrobersiya sa luna sa mga Balili, gilambigit sab si Bolo sa transaksiyon sa yuta sa subdivision sa iyang Dakbayan sa Talisay nga nisangpot sa makalilisang nga baha sa kasilinganang kabalayan ug sibawng tiyabaw sa mga mag-uuma nga wa mabayri.

-o0o-

            Managlahi ang kapalaran nilang Bolo ug Durano sa ilang gihikay nga mga transaksiyon sa yuta.  Apan badlis gyod tingali sa ilang pad nga magkaabot sa pagbaligya sa luna sa mga Balili sa Tinaan, Naga.  Si Bolo niingon nga wa kadawat bisan usa ka dako gikan sa transaksiyon.  Si Lumen giila sa mga Balili nga maoy nakadawat sa P4.3 milyones nga komisyon.

            Bisan naapiki, si Bolo takos pang makapanalipod sa iyang kaugalingon.  Si Lumen namatay na sa sakit sa niaging tuig, usa ka buwan human naimpas sa Kapitolyo ang P98.9 milyones nga bayranan sa luna.  Ug di nang kapanalipod sa iyang kaugalingon sa bisan unsang mga pasangil nga luwatan batok niya.

-o0o-

            Apan di hingpit nga inutil si Lumen.  Ang iyang bana nga mas unang nasakit kay niya nagpabilin nga maoy usa sa labing ngilngig nga abogado sa Sugbo.  Si kanhi provincial prosecutor, karon dean sa USP College of Law, Loreto Durano di motugot nga di makiangayong panamastamasan ang kadungganan sa iyang asawa.

            Si Durano nitug-an sa Arangkada sa DYAB Abante Bisaya sa niaging semana nga wa pa niya matino kon nadawat ba gyod sa iyang asawa ang P4.3 milyones nga komisyon.  Nagduda sab si Durano sa kadako sa papel nga gipahid ngadtong Lumen, "Dako ra kaayo tong transaksiyona para niya."  [30]  leo_lastimosa@abs-cbn.com

Arangkada of Leo Lastimosa for August 29, 2009

                        IGMAT SA YUTA

 

            Atol sa iyang unang termino pagka gobernador sa Sugbo, si karon Kongresista Pablo Garcia nipatawag ni kanhi provincial board (PB) member Raul Bacaltos.  Kinsa iyang gisugo sa pagpakigsulti sa mga mag-uuma nga maapektahan sa gitakdang pagpalit sa Kapitolyo sa usa ka gatos ka ektaryang luna sa Barili.  Nga maoy balhinan sa CSCST College of Agriculture gikan sa Sudlon sa Dakbayan sa Sugbo.

            Wa mahibung si Bacaltos sa sugo kay siya may tsirman sa committee on properties sa PB.  Apan kakugang ang nagpaabot niya sa Barili.  Giingnan siya sa mga mag-uuma nga may board member na nga nakauna pagpakigsulti niya,  nakatag-an ka, iyang kauban sa unang distrito, si Juan Bolo.

                        -o0o-

            Igmat gyod diay si Bolo kon transaksiyon na sa yuta ang hisgutan.  Lupig gud niya ang mas batan-on nga si Bacaltos.  Di gyod diay siya magpangikog sa iyang kaubanan sa PB.  Nibutho siya sa Barili bisan si Bacaltos ang gisugo.  Wa na gani kahinumdom si Bacaltos kon sakop ba sa iyang komtiba si Bolo.

            Tungod sa gibutyag ni Bacaltos, di na kahibudngan ang pasangil nga gimandoan ni Bolo ang appraisal committee pagsusi sa luna sa mga Balili sa Tinaan, Naga bisan wa pa siya matudlo nga pangu sa committee on properties niadtong Hunyo 2007.  Apan niangkon si Bacaltos nga wa siyay gihimo bisan sa pagpanapaw ni Bolo.  Sa ato pa, bisan sa panahon pa sa pagduma sa amahan ni Gobernador Gwen Garcia, ikogay na ang salida sa PB.

                        -o0o-

            May sukaranan ang paniid sa usa ka lokal nga opisyal nga kon ang mga sakop sa PB niggahin pa lang og bisan katloan lang ka gutlo sa ilang sesyon aron pagtuki sa ilang resolusyon nga nagtugot ni Garcia pagpalit sa luna sa mga Balili di unta sila magkinahanglan og daghang mga adlaw karon sa pagpasabot ug pagpanalipod sa ilang pagmika, pagpabaya ug kapakyas pagtuman sa labing batakan nilang katungdanan pagpanalipod sa interes sa mga Sugbuanon.

            Apan puslan man nga nagpatuo na sila nga naghinulsol sa ilang bulilyaso, mas maayong hingpiton na lang sa board members ang ilang pagduko sa sudya sa ilang tanlag pinaagi sa pagpamalandong unsa pa ang ubang multi-milyones pesos nilang transaksiyon nga gidominahan sab sa way kamatayon nga pagpanlaktod.

                        -o0o-

            Sukwahi sa gipatuo ni Gobernador Garcia nga gipaburot lang ang kontrobersiya sa kapakyas niya pagkuha sa ratification sa PB sa memorandum of agreement (MOA) uban sa mga Balili, mao ni ang motino sa iyang kinatibuk-ang responsibilidad sa kontrobersiya.

            Kay kon mapamatud-an nga gikinahanglan gyod ang ratification kay managlahi ang presyo ug ang gidak-on sa luna nga gitakda sa resolusyon sa PB ug sa MOA maisip nga ilegal ang iyang pagpaggawas sa P98.9 milyones sa buhis nga hinagoan sa mga Sugbuanon.  [30]  leo_lastimosa@abs-cbn.com

Arangkada of Leo Lastimosa for August 28, 2009

                        PINALITAY SA YUTA

 

            Pila na ka transaksiyon sa yuta ang gisudlan sa Kapitolyo sa Sugbo?  Di lang atol sa duha ka termino ni Gobernador Gwen Garcia kon dili apil na sa gisundan nga siyam ka tuig nga pamunoan sa iyang amahan, si karon Kongresista Pablo Garcia?

            May lain pa ba gawas sa nahibaw-an sa mga Sugbuanon nga gatosan ka ektaryang luna nga ilang gipalit sa Barili, Naga, Minglanilla ug Carmen?  Tinuod ba nga kasagaran sa mga luna igo lang gipamayran apan gipasagdan lang ug wa na mapusli?  Unsa man ang garantiya sa Sugbuanon nga mga magbubuhis nga ang nangaging mga pagpamalit sa yuta wa sab mosubay sa ruta sa transaksiyon sa mga Balili—gidalidali ug gilaktod?

                        -o0o-

            Kalanog kaha sa tiningob ug dinungan nga pagginhawa og luag sa mga sakop sa Provincial Board (PB) dihang ilang nahibaw-an nga wa diay nila ma-ratify ang memorandum of agreement (MOA) nga gipirmahan ni Gobernador Gwen Garcia uban sa mga Balili.  Kaggaan kaha sa ilang paminaw dihang naamgohan nga kon magkinaunsa man—kon lamdagan sa Espiritu Santo ang panghunahuna ug tisokan og kaisog ang kasingkasing sa mga imbestigador sa Visayas Ombudsman ug mangahas pagtinuod sa ilang mga gimbuhaton—makapanghunaw silang tanan, gawas ni Bolo, og kalambigitan sa P89.9 milyones nga kahiwian.

            Sa kasamtangan, magpaka aron ingnon silang mosubay sa script sa Kapitolyo:  Iduot si Bolo ug si Bolo lang.  Bisan nag-anam kalisod ang pagtago sa nagkadaghang mga siwil nga nagpakita nga wa mag-solo si Bolo sa salida.

                        -o0o-

            Kon makaikyas man gyod gani gikan sa mga kasong kriminal, maglisod hinuon ang mga sakop sa PB paglikay sa mga kasong administratiba—salamat sa pagmika ug pa-goryo-goryo sa ilang katungdanan.  Makiangayon lang nga, sama ni Garcia, moangkon sab sila og responsibilidad ug mangayo og pasaylo gikan sa mga Sugbuanon.

            Apan sa di pa makumbinser ang mga magbubuhis sa ilang paghinulsol, angayng motug-an sab silang Garcia ug ang mga sakop sa PB giunsa nila pagpalusot ang nangaging mga transaksiyon sa Kapitolyo—pagpalit man og yuta o pagtukod man sa CICC ug sa ubang mga proyektong infrastractura sa nagkalainlaing kalungsoran ug mga dakbayan.

                        -o0o-

            Nipundayon ba lang sab sila sa way kinutoban nga pag-apura ug paglipatlipat?  Gihatagan ba sab sa hingpit nga pagsalig si Bolo ug ubang mga naghikay sa pagpalit sa yuta sa Barili, Naga, Minglanilla ug Carmen ug ubang mga transaksiyon?  Gibundak-bundak ba sab ang ngan ni Garcia ug nagyangu-yango ug gitun ba lang sab sa mga sakop sa PB ang ilang dila?

            Gipirmahan ba lang sab ni Garcia ang mga dokumento sa way pagsusi kinsay nag-andam ug diin gikan?  Ug gihikawan ba sab ang PB sa kahigayonan pagsubli sa mga dokumento aron matino may panginahanglan ba sa ratification?  [30]  leo_lastimosa@abs-cbn.com

Arangkada of Leo Lastimosa for August 27, 2009

                        KAPILA NA MANGLAKTOD?

 

            Nagkadaghan ang mga pamahayag nga giluwatan nilang Gobernador Gwen Garcia ug kaubanan, nagkalawom ang gahong nga ilang nahimutangan.  Samtang nabantang nang determinasyon sa Kapitolyo paglubong ni Provincial Board (PB) Member Juan Bolo, salamat sa kalapad sa dagat nga nitabon sa yuta sa mga Balili nga ilang gi-usik-usikan sa buhis sa mga Sugbuanon, natagpisaw ug nagkabulingit sab sila.

            Karon nabisto na wa diay magbinugtong si Bolo sa pagpalusot sa transaksiyon.  Giabagan siya sa hingpit nga pagpabaya sa iyang kaubanan sa PB ug ubang mga departamento sa Kapitolyo.  Di sang kapanghimakak si Garcia sa dakong papel nga iyang gihuptan pagtino nga kabayran ang wa pa igkita nga yuta sa mga Balili sa labing daling panahon.

                        -o0o-

            Dapiton nako ang imong pagtagad sa pagpirma ni Garcia sa memorandum of agreement (MOA) uban sa mga Balili.  Ang notaryo nagkanayon nga gipirmahan niya ang MOA niadtong Abril 21, 2008.  Apan si Garcia niingon nga napirmahan niya ang MOA sa wa pang Abril 21 kay niadtong adlawa nilarga na siya paingon sa Guam.

            Sama sa ubang opisyal sa Kapitolyo nga naligsan, kaluoy sa abogado sa Kapitolyo nga maoy nag-notaryo sa MOA.  Siya ang mapiit sa paghimo sa bakak nga pangangkon nga gipirmahan ni Garcia ang MOA sa iyang atubangan niadtong Abril 21.  Apan di hingpit nga makalingkawas si Garcia.  Ang unod sa MOA maoy nipasiwil alang sa tanang hingtungdan sa sidsid sa iyang saya.

                        -o0o-

            Matod ni Garcia gipirmahan niya ang MOA pinasikad sa unang resolusyon sa PB niadtong Enero 14, 2008 nga nagtugot niya pagsud sa transaksiyon.  Apan ang presyo ug ang gidak-on sa luna nga gitakda sa iyang gipirmahan nga MOA wa motakdo sa unang resolusyon.  Kon dili sa ikaduhang resolusyon nga gipasar sa PB sa samang adlaw sa iyang pagpirma sa MOA.

            Duna lay gamayng problema.  Ang ikaduhang resolusyon di pa epektibo kay napirmahan ni Acting Governor Greg Sanchez pagka Abril 24 na.  Inay ipasabot ang bulilyaso, si Garcia sama sa naandan nitulisok ni Bolo.  Kay matod niya wa kinahanglana ang ikaduhang resolusyon.  Nga, nakatag-an mo, gipasar sa PB tungod sa pagtuo nga kang Garcia ang transaksiyon.

                        -o0o-

            Mas lisod tuohan ang pangangkon ni Garcia nga wa siyang kahibawo nga si Bolo ray nag-andam sa MOA.  Kon tinuod nga wa siyang kahibawo diin gikan ang dokumento, unsa may garantiya sa Sugbuanong mga magbubuhis nga iya ning gibasa?  Gawas pa, mas tulukibon ang kapakyas sa PB pagdason sa MOA nga iyang gipirmahan.

            Kon tinuod nga gitipigan rang Bolo ang MOA human pirmahi ni Garcia, makuwestiyon ang kaligdong sa paghikay sa mga dokumento sa Kapitolyo.  Di lang sa pagpalit sa yuta, aw dagat diay, nga giangkon sa mga Balili.  Kon dili hasta sa uban pang multi-milyones pesos nga mga transaksiyon nga ilang gisudlan.  [30]  leo_lastimosa@abs-cbn.com

Arangkada of Leo Lastimosa for August 26, 2009

                NAKAMENOS NATO

 

            Nakamenos gyod diayng Kapitolyo sa mga Sugbuanon.  Gawas nga wa kakita asa nagsugod ug asa kutob ang 25 ka ektaryang luna sa mga Balili sa Tinaan, Naga, wa sab diay sila magtagad pagtan-aw sa mga titulo sa yuta.

            Kon may bisan gamay pa lang untang kaikog silang Gobernador Gwen Garcia ug kaubanan sa kabos nga mga Sugbuanon, kansang mandato maoy nakapahimutang nila sa katungdanan ug kansang buhis maoy ilang giwaldas, gihuwat unta una nila ang mga titulo sa yuta, bahala na kon wa sila magtagad pagsusi sa naa ba sa ibabaw o ilawom sa dagat, wa pa hatagi og pasiunang bayad ang mga Balili.

                        -o0o-

            Nahugno ang kinakusgang panagang nilang Garcia ug kaubanan sa nabulilyasong transaksiyon:  Nga nibayad sila sa mga Balili kay nisalig sa katinuod sa mga titulo ug sa Torrens System nga maoy gisunod sa Republika sa Pilipinas.  Ang sistema niila sa original certificate of title o sa transfer certificate of title isip pruyba sa pagpanag-iya.

            Ang wa pagpaabot sa certified true copies sa mga titulo nagmatuod nga mas determinado ang Kapitolyo pagpalusot sa transaksiyon kay sa pagpanalipod sa interes sa mga Sugbuanon.  Di diay tinuod nga bilib sila sa torrens kon dili mas bilib sila sa "tulin" system. Hinaot nga ang ilang pag-isnab sa titulo wa magkahulogan nga gihatagan nilag mas dakong importansiya ang "porsiyento" sa transaksiyon.

                        -o0o-

            Laing kahibulongan nga bahin sa transaksiyon:  Dunay duha ka resolusyon nga gipasar ang provincial board pagtugot ni Garcia pagsud sa transaksiyon uban sa mga Balili—ang orihinal nga resolusyon niadtong Enero 14, 2008 nga nagtakda sa presyo nga tag P434 matag metro cuadrado giusab niadtong Abril 21, 2008 nga nagpaubos sa presyo ngadto sa P400 matag metro cuadrado; apan si Garcia wa magpaabot nga ma-epektibo ang inusab nga resolusyon, gipirmahan niyang MOA pinasikad sa pagtugot sa unang resolusyon apan ginamit ang presyo sa ikaduhang resolusyon.

            Unsa may ilang gidalian?  Nganong mora man silag gisilihan?  Nganong mora mag naglumba paglayat nga morang wa nay ugma?

                        -o0o-

            Nagkadaghan ang nanggawas nga kasayuran mahitungod sa transaksiyon, nagkabantang ang kadako sa papel ni Board Member Juan Bolo—gikumbinser si Garcia pagpalit sa yuta, giapura ang appraisal committee pagtakda sa presyo sa luna, gikumbinser ang provincial board pagtugot ni Garcia ug pag-andam sa deed of sale ug sa MOA.

            Masabot nga nagkarakara ang appraisal committee dihang gibundakan ni Bolo sa ngan ni Garcia.  Katuohan sab nga nagyanguyango ang provincial board dihang giwarawara ni Bolo ang ngan ni Garcia.  Apan pasayloa nga maglisod ko pagtuo nga hasta si Garcia naapil og kakugang ug nahasiril-siril nga morang gilubatlubatan dihang giapura ni Bolo.  Gawas lang kon nakumbinser ni Bolo si Garcia nga tinuoray ning transaksiyon ni Garcia.  [30]  leo_lastimosa@abs-cbn.com

Arangkada of Leo Lastimosa for August 26, 2009

                NAKAMENOS NATO

 

            Nakamenos gyod diayng Kapitolyo sa mga Sugbuanon.  Gawas nga wa kakita asa nagsugod ug asa kutob ang 25 ka ektaryang luna sa mga Balili sa Tinaan, Naga, wa sab diay sila magtagad pagtan-aw sa mga titulo sa yuta.

            Kon may bisan gamay pa lang untang kaikog silang Gobernador Gwen Garcia ug kaubanan sa kabos nga mga Sugbuanon, kansang mandato maoy nakapahimutang nila sa katungdanan ug kansang buhis maoy ilang giwaldas, gihuwat unta una nila ang mga titulo sa yuta, bahala na kon wa sila magtagad pagsusi sa naa ba sa ibabaw o ilawom sa dagat, wa pa hatagi og pasiunang bayad ang mga Balili.

                        -o0o-

            Nahugno ang kinakusgang panagang nilang Garcia ug kaubanan sa nabulilyasong transaksiyon:  Nga nibayad sila sa mga Balili kay nisalig sa katinuod sa mga titulo ug sa Torrens System nga maoy gisunod sa Republika sa Pilipinas.  Ang sistema niila sa original certificate of title o sa transfer certificate of title isip pruyba sa pagpanag-iya.

            Ang wa pagpaabot sa certified true copies sa mga titulo nagmatuod nga mas determinado ang Kapitolyo pagpalusot sa transaksiyon kay sa pagpanalipod sa interes sa mga Sugbuanon.  Di diay tinuod nga bilib sila sa torrens kon dili mas bilib sila sa "tulin" system.  Hinaot nga ang ilang pag-isnab sa titulo wa magkahulogan nga gihatagan nilag mas dakong importansiya ang "porsiyento" sa transaksiyon.

                        -o0o-

            Laing kahibulongan nga bahin sa transaksiyon:  Dunay duha ka resolusyon nga gipasar ang provincial board pagtugot ni Garcia pagsud sa transaksiyon uban sa mga Balili—ang orihinal nga resolusyon niadtong Enero 14, 2008 nga nagtakda sa presyo nga tag P434 matag metro cuadrado giusab niadtong Abril 21, 2008 nga nagpaubos sa presyo ngadto sa P400 matag metro cuadrado; apan si Garcia wa magpaabot nga ma-epektibo ang inusab nga resolusyon, gipirmahan niyang MOA pinasikad sa pagtugot sa unang resolusyon apan ginamit ang presyo sa ikaduhang resolusyon.

            Unsa may ilang gidalian?  Nganong mora man silag gisilihan?  Nganong mora mag naglumba paglayat nga morang wa nay ugma?

                        -o0o-

            Nagkadaghan ang nanggawas nga kasayuran mahitungod sa transaksiyon, nagkabantang ang kadako sa papel ni Board Member Juan Bolo—gikumbinser si Garcia pagpalit sa yuta, giapura ang appraisal committee pagtakda sa presyo sa luna, gikumbinser ang provincial board pagtugot ni Garcia ug pag-andam sa deed of sale ug sa MOA.

            Masabot nga nagkarakara ang appraisal committee dihang gibundakan ni Bolo sa ngan ni Garcia.  Katuohan sab nga nagyanguyango ang provincial board dihang giwarawara ni Bolo ang ngan ni Garcia.  Apan pasayloa nga maglisod ko pagtuo nga hasta si Garcia naapil og kakugang ug nahasiril-siril nga morang gilubatlubatan dihang giapura ni Bolo.  Gawas lang kon nakumbinser ni Bolo si Garcia nga tinuoray ning transaksiyon ni Garcia.  [30]  leo_lastimosa@abs-cbn.com

Arangkada of Leo Lastimosa for August 25, 2009

                        BAHAG ANG IKOG

 

            Pila ka adlaw human nangayo og pasaylo ug niangkon og responsibilidad si Gobernador Gwen Garcia sa pagpalit sa luna sa mga Balili nga naa pa sa ilawom sa dagat sa Tinaan, Naga, nagkapuliki ang mga opisyal sa Kapitolyo pagmatuod nga di diay bulilyaso ang transaksiyon:

·        Legal diayng transaksiyon kay wa pa maaprobahi ang walo ka tuig nang rekomendasyon sa DENR pagbasura sa mga titulo sa mga Balili;

·        Bisang mga luna ilawom sa dagat mapuslan sa reclamation project ginamit ang abo sa uling nga itam-ok-na-binayran-pa sa Kepco-SPC Power Plant Corporation; ug

·        Kon di na mabawi ang P38 milyones, may ubang yuta ang mga Balili nga makuha ang Kapitolyo.

                        -o0o-

            Bisan si Cebu Provincial Board Member Juan Bolo, kansang lifestyle gitumbok nga inanayng nausab human sa transaksiyon, niisa sa kahigayonan nga kapanalipdan sa Kapitolyo bisan ang mga titulo sa pagatpatan ug sa mga luna ilawom sa dagat.  Inay modason sa makiangayong mga pagsaway sa pagpatitulo sa Silot Bay sa Liloan, si Bolo nipili pagkabayo sa gikuwestiyong hukom sa Korte Suprema nga nipatigbabaw sa katungod sa nakapalit sa mga titulo nga nakuha sa ilad.

            Saliging mga abogado sa Kapitolyo nga makapangita og lusot bisan sa labing makauuwawng mga transaksiyon nga ilang masudlan.  Bisan ang pagduot nilang Bolo atubangan sa publiko, sama sa pagpangayog pasaylo ni Garcia, mahimong kabahin lang diay sa ulug-ulog paghupay sa kasuko sa Sugbuanong mga magbubuhis.

                        -o0o-

            Apan ang transaksiyon, nga nakapaalkanse pag-ayo sa kagamhanan, nahuman na.  Ang bisan unsang lusot—pagbawi sa kuwarta, pagpanalipod sa titulo ug pagpangita og kapuslanan sa kuwestiyonableng kabtangan—di makapapas sa nahimo nang kalapasan sa balaod.  Ang pagpabaya nilang Garcia ug ubang kadagkoan sa Kapitolyo di mahimong kalimtan ug isalindto na lang.

            Hinaot nga di magpalipat ang mga Sugbuanon gikan sa tinuod nga isyu.  Giwaldas sa Kapitolyo ang ilang buhis sa transaksiyon nga marka pataka.  Bisan unsaon pagpakauwaw sa Kapitolyo ang mga nibutyag sa kahiwian, hinaot nga padayong maningil ang mga magbubuhis sa mga nibudhi sa ilang pagsalig.

                        -o0o-

            Ayaw na lag palipat og subay sa imbestigasyon sa Kapitolyo nga gipasiugdahan ra sab sa mga imbestigahunon.  Hinunoa, tabang og paniid sa imbestigasyon sa Visayas Ombudsman sa eskandalo.  Labihan nila kamaikugon nga nalukop na sila pagpangayo sa tabang sa pribadong mga tawo ug ubang buhatan sa kagamhanan, gawas sa taga Kapitolyo nga maoy utok sa transaksiyon.

            Ambot nganong mahadlok si Visayas Ombudsman Pelagio Apostol paggamit sa iyang gahom pagsupina aron mapugos silang Garcia ug kaubanan pagtahan sa mga dokumento sa gikuwestiyon nilang mga transaksiyon—sama sa pagpalit sa luna sa mga Balili ug sa pagtukod sa CICC.  Bisan ang nakabuylo na nilang imbestigasyon sa deco lampposts sa Asean Summit wa gyong kaabot sa kinadak-ang isda—si DPWH Secretary Hermogenes Ebdane.  [30]  leo_lastimosa@abs-cbn.com

Arangkada of Leo Lastimosa for August 24, 2009

                UNSAON PAGLUSOT

 

            Naka-komisyon man si Cebu Provincial Board Member Juan Bolo o wa, may mga opisyal man sa Kapitolyo nga nagduka pagtuman sa ilang katungdanan o wa, nagpiyong man ang mga sakop sa provincial board sa pagpalusot sa pagpalit sa yuta sa mga Balili o wa, di na mahinungdanon.  Giduphan na silang tanan ni Gobernador Gwen Garcia sa iyang pag-angkon og responsibilidad sa ilang pagpalit sa luna nga naa pa ilawom sa dagat.

            Katungod ni Garcia ang pagsusi naka-komisyon ba si Bolo, o gilipat ba sa iyang kaubanan sa Kapitolyo, apan bisan unsay iyang makaplagan di na mahinungdanon.  Niangkon na siya og responsibilidad.  Gawas kon bakwion ang pagpangayog pasaylo ug moinsistir nga wa diay siyay labot sa bulilyaso.

-o0o-

            Nabulilyaso gyod ang transaksiyon sa Kapitolyo.  Niangkon man o wa og responsibilidad si Garcia.  Nakapalit gyod sila og yuta ilawom sa dagat gipasidan-an man sila o wa sa DENR.  Naalkanse gyod ang Sugbuanong mga magbubuhis.  Gi-negosyo man o wa ni Atty. Ben Cabrido ang iyang pagka environmentalist.

            Inay mangita og laing matulisok, mas makaayo alang sa tanang hingtungdan kon ang Kapitolyo magsugod na og tubag sa responsibilidad sa bulilyaso nga ila nang giangkon.  Inay gamiton ang ilang makinarya pagbuong sa kadungganan sa mga tawo nga way bisan gamayng labot sa bulilyaso nga ilang gisudlan, mas maayo tingaling ang Kapitolyo mohingpit na lang gyod pagdawat sa tukmang silot sa balaod sa krimen kansang responsibilidad ila nang giangkon.

-o0o-

            Unsay krimen nga ilang nahimo?  Ang pagsud og transaksiyon nga klarong nakapaalkanse sa kagamhanan.  Sa ilang pagbayad sa yuta sa mga Balili nga naa pa ilawom sa dagat, ilang gibudhian ang pagsalig sa mga Sugbuanon ug giwaldas ang buhis nga ilang hinagoan.  Unsay lain nilang atraso?  Ang wa paghimo sa butang nga angay untang himuon:  Mora lang namalit og lugod sa Carbon, wa gyod silang kahigayon pagsusi diin nagsugod ug asa kutob ang kabtangan nga ilang gipalit.

            Apan di mahitabong ang kadagkoan sa Kapitolyo moboluntaryo lag papriso.  Bisan may mga kaso nang gipasaka batok nila.  Unsa ba katakos ang mga buhatan sa kagamhanan nga gitahasan paggukod sa mga malapason?

-o0o-

            Mao nay dakong suliran.  Ang Visayas Ombudsman puti og kiting.  Isog kaayong moggukod og kartero nga naka-dispalko og P5.  Apan di ganahang mosusi sa mga pasangil sa overpricing ug pagpanglaktod  sa CICC.  Ilang pangu nga si Pelagio Apostol ang labing talawan.  Aron pagpasabot nganong wa kairog ang pakisusi sa CICC, gihulagway ni Apostol ang transaksiyon nga "komplikado ra kaayo" ug ang iyang graft investigators nga "di kamao."

            Maong di na lang ta mahibung kon way kapaingnan ang imbestigasyon sa yuta sa mga Balili, bisan sa pagkumpisal na sa Kapitolyo.  Kuyawng "komplikado ra kaayo" ang transaksiyon alang ni Apostol ug ang graft investigators nagpabiling "di kamao."  [30]  leo_lastimosa@abs-cbn.com